இது லிஸ்ட்லயே இல்லையே.. பாஜகவுக்கு அதிர்ச்சி கொடுத்த ரங்கசாமி! புதுச்சேரியில் கருணாநிதிக்கு சிலை

புதுச்சேரி: மாநில அரசு சார்பில் புதுச்சேரியில் தமிழ்நாடு முன்னாள் முதலமைச்சர் கருணாநிதிக்கு விரைவில் சிலை நிறுவப்படும் என புதுச்சேரி மாநில முதலமைச்சர் ரங்கசாமி உறுதியளித்து இருக்கிறார்.

தமிழ்நாடு முன்னாள் முதலமைச்சரும், திமுக முன்னாள் தலைவருமான கருணாநிதியின் 4 ஆம் ஆண்டு நினைவுநாள் இன்று தமிழக அரசு சார்பிலும் திமுக சார்பாகவும் அனுசரிக்கப்பட்டு வருகிறது. அந்த வகையில் இன்று சென்னையில் கருணாநிதி பிறந்தநாளை முன்னிட்டு மாரத்தான் ஓட்டப்போட்டி நடத்தப்பட்டது.

சென்னையில் உள்ள கருணாநிதியின் நினைவிடத்தில் முதலமைச்சர் மு.க.ஸ்டாலின், தமிழ்நாடு அமைச்சர்கள், திமுக மூத்த தலைவர்கள், கூட்டணி கட்சித் தலைவர்கள், திமுக தொண்டர்கள் என பலரும் அஞ்சலி செலுத்தி வருகிறார்கள்.

புதுச்சேரி திமுக

இதேபோல், புதுச்சேரியிலும் முன்னாள் முதலமைச்சர் கருணாநிதியின் 4 ஆம் ஆண்டு நினைவு தினத்தை முன்னிட்டு மாநில திமுக அமைப்பாளரும், சட்டமன்ற எதிர்கட்சி தலைவருமான இரா.சிவா தலைமையில் ஆயிரத்திற்கும் மேற்பட்ட திமுகவினர் அமைதி பேரணி சென்று, கருணாநிதியின் திரு உருவப் படத்திற்கு மலர் தூவி மரியாதை செலுத்தினர்.

ரங்கசாமியுடன் சந்திப்பு

பின்னர் மாநில திமுக அமைப்பாளர் இரா.சிவா தலைமையில், மாநில திமுக அவைத்தலைவர் எஸ்.பி.சிவக்குமார், சட்டமன்ற உறுப்பினர்கள் அனிபால் கென்னடி, சம்பத், செந்தில்குமார், துணை அமைப்பாளர் வழக்கறிஞர் செந்தில்குமார், திமுக தொகுதி பொறுப்பாளர் கார்த்திகேயன், திமுக பொதுக்குழு உறுப்பினர் வேலவன், நித்திஷ் ஆகியோர் புதுச்சேரி மாநில முதலமைச்சர் ரங்கசாமியை அவரது இல்லத்தில் சந்தித்தனர்.

கருணாநிதி சிலை

இந்த சந்திப்பின்போது, புதுச்சேரியில் கருணாநிதியின் அவர்களின் திருவுருவச்சிலையை அமைக்க வேண்டும் என்று கோரிக்கை வைத்தனர். இதனை கேட்ட புதுச்சேரி முதலமைச்சர் ரங்கசாமி, "கருணாநிதி அவர்களுக்கும் எனக்கும் நெருங்கிய தொடர்பும், நட்பும் இருந்தது. அவர் மீது எனக்கு மிகுந்த மரியாதையும் உண்டு, எனவே புதுச்சேரி அரசு சார்பில் கருணாநிதி அவர்களுக்கு புதுச்சேரியில் சிலை நிறுவப்படும் என்று உறுதியளித்தார்.

பாஜக கூட்டணி

தற்போது புதுச்சேரியில் பாஜகவுடன் கூட்டணி அமைத்து என்.ரங்கசாமி தலைமையிலான என்.ஆர்.காங்கிரஸ் ஆட்சி செய்து வருகிறது. தமிழ்நாட்டில் கருணாநிதியின் பேனாவுக்கு சிலை அமைக்க பாஜக உள்ளிட்ட கட்சிகள் எதிர்ப்பு தெரிவித்து வரும் சூழலில் புதுச்சேரி முதலமைச்சர் கருணாநிதிக்கு சிலை வைக்கப்போவதாக வெளியிட்டுள்ள அறிவிப்பு அக்கட்சியினரை அதிர்ச்சியடைய செய்துள்ளது.

English summary

Puducherry CM Rangasamy announced that govt open Karunanithi statue: மாநில அரசு சார்பில் புதுச்சேரியில் தமிழ்நாடு முன்னாள் முதலமைச்சர் கருணாநிதிக்கு விரைவில் சிலை நிறுவப்படும் என புதுச்சேரி மாநில முதலமைச்சர் ரங்கசாமி உறுதியளித்து இருக்கிறார்.