திருமண பேனரில் ஜாதகம்.. "மாப்பிள்ளை நாங்கதாங்க" நண்பர்கள் "அட்டூழியம்".. புகைச்சலில் 90ஸ் கிட்ஸ்
ராமநாதபுரம்: ராமநாதபுரத்தில் திருமண நிகழ்ச்சியொன்றில் நண்பர்கள் வைத்த பேனர்தான் அனைவராலும் பேசப்பட்டு வருகிறது.
திருமணம் உள்ளிட்ட வீட்டில் எந்த விசேஷம் நடந்தாலும் பேனர் அடிக்கும் கலாசாரம் தமிழகத்தில் பல ஆண்டுகளாக வழக்கத்தில் உள்ளது. சிலர் அவர்களுக்கு பிடித்த நடிகர், நடிகைகள் படங்களை, கடவுள் படங்களை வைத்துக் கொள்வார்கள்.
இன்னும் சிலர் ஒரு படி மேலே போய் அரசியல் கட்சித் தலைவர்களின் படங்களை வைத்தும் பேனர் அடிப்பார்கள். கடந்த சில ஆண்டுகளாக பேனரில் எழுதப்படும் வசனம் பலரது கவனத்தை ஈர்க்க வேண்டும் என வித்தியாசமான வசனங்களை எல்லாம் அச்சடித்து வருகிறார்கள்.
கட்அவுட்
அதிலும் கட் அவுட்டுகளில் மணமக்களின் நண்பர்களின் மனக்கோட்டைகளில் மலர்ந்த வசனங்களுக்கு எல்லையே இல்லை என கூறலாம். அந்த வகையில் ராமநாதபுரத்தை சேர்ந்த மணமக்கள் நவீன்ராஜ், லாவண்யா திருமணம் அரண்மனை சாலையில் உள்ள தனியார் திருமண மண்டபத்தில் நடைபெற்றது.
மணமகனின் நண்பர்கள்
மண்டபத்திற்கு வெளியே மணமகனின் நண்பர்கள் வைத்திருந்த பேனர் சமூகவலைதளங்களில் வைரலாகி சிரிப்பை வரவழைத்துள்ளது. அந்த பேனரில் மணமக்கள் புகைப்படத்திற்கு கீழ் ஜாதக வடிவில் மணமகனின் நண்பர்கள் தங்கள் புகைப்படம், பெயர், ராசி மற்றும் நட்சத்திரத்தை குறிப்பிட்டு "கல்யாணத்துக்கு வாங்க அடுத்த மாப்பிள்ளைங்க நாங்க" என்ற வசனத்துடன் பேனர் வைத்துள்ளனர்.
90 கிட்ஸ்
இந்த பேனரை திருமணத்திற்கு வந்திருந்த உறவினர்கள் மற்றும் பொதுமக்கள், ஒரு நிமிடம் நின்று பார்த்து புன்னகைத்து சென்றனர். அதே நேரத்தில் 80 மற்றும் 90களில் பிறந்து இன்று வரை திருமணம் ஆகாமல் உள்ள அப்பகுதியைச் சேர்ந்த இளைஞர்கள் இந்த பேனரில் என்னோட போட்டோவையும் சேர்த்து போட்டிருக்கலாமே என "உச்" கொட்டியபடி கடந்து சென்றதையும் பார்க்க முடிந்தது.
திருமண வரவேற்பு
நண்பர்களுக்கு திருமண வரவேற்பு நிகழ்ச்சியில் பல்வேறு வகையில் வரவேற்பு பேனர் அடித்து வைத்து தங்களின் அன்பை வெளிப்படுத்தும் நிலையில், நண்பருக்கு வாழ்த்து சொன்ன மாதிரியும் தங்களுக்கு பெண் கேட்ட மாதிரியும் ஒரே கல்லில் இரண்டு மாங்காய் அடித்துள்ள இந்த இளைஞர்களை பாராட்டாமல் இருக்க முடியாது.
Click it and Unblock the Notifications
Sign in with Google