நாத்தம் புடிச்ச சேர்மன் பதவி.. 2 கோடி கொடுத்து இங்க வந்தோம்.. திமுக நகராட்சி தலைவரின் தங்கை ஆவேசம்!
ராமநாதபுரம்: ராமநாதபுரம் மாவட்டம் கீழக்கரை நகராட்சி தலைவருக்கும், கவுன்சிலர்களுக்கும் இடையே கமிஷன் பிரிப்பதில் மோதல் ஏற்பட்டுள்ளது. இதில் சேர்மனின் தங்கை, கவுன்சிலர்களிடம் வாக்குவாதத்தில் ஈடுபட்ட வீடியோ சமூக வலைதளங்களில் பரவி பரபரப்பை ஏற்படுத்தியுள்ளது.
இராமநாதபுரம் மாவட்டம் கீழக்கரை நகராட்சியில் திமுக கூட்டணிக்கு 12 கவுன்சிலர்கள், அதிமுகவுக்கு 1 கவுன்சிலர், எஸ்டிபிஐ கட்சிக்கு 1 கவுன்சிலர், சுயேட்சைகள் 7 பேர் என 21 கவுன்சிலர்கள் உள்ளனர். நகராட்சித் தலைவராக திமுகவை சேர்ந்த சபானாஸ் ஆபிதா, துணைத் தலைவராக ஹமீது சுல்தான் ஆகியோர் பதவி வகித்து வருகின்றனர்.
இந்நிலையில் 21 வார்டுகளுக்கும் தெரு விளக்குகள் பொருத்த ரூ.1.18 கோடி மதிப்பில் டெண்டர் விடப்பட்டு, 3 சதவீத கமிஷன் நகராட்சி தலைவரிடம் ஒப்படைக்கப்பட்டதாக கூறப்படுகிறது. இந்த தொகையை கவுன்சிலர்கள் யாருக்கும் பங்கு பிரித்து தர முடியாது என நகராட்சி தலைவரின் தங்கை ஹமீதா, நகராட்சி தலைவர் சபானாஸ் ஆபிதா, அவரது சகோதரர் இஸ்திகா ஹசன் ஆகியோர் முன்னிலையில் நகர்மன்ற அலுவலகத்தில் கவுன்சிலர்களிடம் ஆக்ரோஷமாக பேசி வாக்குவாதத்தில் ஈடுபட்டுள்ளார்.
உள்ளாட்சி தேர்தலில் பெரும் தொகை செலவழித்து சேர்மன் பதவிக்கு வந்திருப்பதாகவும், இதனால் யாருக்கும் பணத்தை பிரித்துக் கொடுக்க முடியாது எனவும், சொத்துகளை விற்று 2 கோடி ரூபாய் கொடுத்துத்தான் சீட்டு வாங்கினோம். ஒவ்வொரு கவுன்சிலர்களுக்கும் ரூ.10 முதல் ரூ.20 லட்சம் வரை பணம் கொடுத்து சேர்மன் ஆனோம் என ஆவேசமாக அவர் பேசிய வீடியோ சமூக வலைதளங்களில் பரவி வருகிறது.
நாத்தம் பிடிச்ச இந்த சேர்மன் பதவிக்கு இவ்வளவு செலவழித்து, உட்கார்ந்து கொண்டிருக்கிறோம். பிச்சைக்காரர்களாக நிற்கிறோம். நாங்கள் எதற்கு காசை பிரித்து கொடுக்க வேண்டும். யாருக்கு வேண்டும் இந்த நாத்த அரசியல்? தலைமுறை தலைமுறையாக உட்கார்ந்து சாப்பிட சொத்து இருக்கு. இந்த ஆயிரத்துக்கும், ஐநூறுக்கும் இங்கு பங்கு போட வேண்டுமா? என அவர் ஆவேசமாக வாக்குவாதம் செய்யும் வீடியோ பரவி வருகிறது.
திமுக நகராட்சி சேர்மன் சபானாஸ் ஆபிதாவின் சகோதரர் இஸ்திகா ஹசன், ராமநாதபுரம் மாவட்ட திமுக அயலக அணி அமைப்பாளர் பொறுப்பில் உள்ளது குறிப்பிடத்தக்கது. இந்நிலையில், கவுன்சிலர்களுக்கு பணம் கொடுத்துத்தான் சேர்மன் ஆனதாக அவரது தங்கை ஒப்புதல் வாக்குமூலம் அளித்துள்ளது பெரும் பரபரப்பை ஏற்படுத்தியுள்ளது.
Click it and Unblock the Notifications
Sign in with Google