ஆபரேஷன் கொங்கு! சேலத்தின் தூண்! எடப்பாடியின் வலது கரம்! தவெகவில் இணைந்த கண்ணன்! யார் இவர்?

Updated: Sunday, May 17, 2026, 12:31 [IST]

Subscribe to Oneindia Tamil

சேலம்: சேலம் மாநகர அதிமுக எம்ஜிஆர் இணைச் செயலாளர் கண்ணனும் அவரது மகன் சஞ்சய்யும் அதிமுகவில் இருந்து விலகி தவெகவில் இணைந்துள்ளனர். அமைச்சர் செங்கோட்டையனை சந்தித்து இருவரும் இணைந்தது எடப்பாடி பழனிசாமி தரப்புக்கு அதிர்ச்சியை ஏற்படுத்தியுள்ளது.

அதிமுக பொதுச் செயலாளர் எடப்பாடி பழனிசாமியின் சொந்த மாவட்டமும், கோட்டையுமாகக் கருதப்படும் சேலத்தில் அக்கட்சிக்கு அதிர்ச்சி வைத்தியம் அளிக்கப்பட்டுள்ளது. சேலம் மாநகர அதிமுக எம்.ஜி.ஆர் மன்ற இணைச் செயலாளரான கண்ணன் மற்றும் அவரது மகன் சஞ்சய் ஆகிய இருவரும் தவெகவில் அதிகாரப்பூர்வமாக இணைந்துள்ளனர்.

தவெகவின் முக்கிய அமைச்சரான கே.ஏ.எஸ் (KAS) முன்னிலையில் இந்த இணைப்பு நிகழ்வு நடைபெற்றது. கண்ணன், இபிஎஸ்-க்கு மிகவும் நெருக்கமானவர் மற்றும் சேலம் மாநகர அதிமுகவின் முக்கியத் தூணாகச் செயல்பட்டவர் என்பதால், அவரது இந்தத் திடீர் முடிவு சேலம் மாவட்ட அதிமுக நிர்வாகிகளையும், ராயப்பேட்டை தலைமையகத்தையும் நிலைகுலையச் செய்துள்ளது.

கொங்கு மண்டலத்தைக் குறிவைக்கும் தவெக: கடந்த இரண்டு நாட்களாக சேலம் மட்டுமல்லாது, கொங்கு மண்டலத்தின் பிற முக்கிய மாவட்டங்களான ஈரோடு, திருப்பூர் மற்றும் கோவை ஆகிய பகுடிகளிலிருந்தும் நூற்றுக்கணக்கான அதிமுக நிர்வாகிகள் தவெக நோக்கி படையெடுத்து வருகின்றனர்.

இதன் உச்சகட்டமாக, ஈரோடு மாவட்ட ஆதிமுகவின் அசைக்க முடியாத சக்தியாக விளங்கிய முன்னாள் அமைச்சர் கே.வி. ராமலிங்கம் தவெகவில் ஐக்கியமாகியுள்ளார். இவருடன் சேர்த்துப் பல்வேறு மாவட்டங்களைச் சேர்ந்த மாவட்ட, ஒன்றிய மற்றும் நகர நிர்வாகிகள் அடுத்தடுத்து தவெகவில் தங்களை இணைத்துக் கொண்டு வருகின்றனர்.

கொங்கு மண்டலத்தில் தவெக தனது அடித்தளத்தை பலப்படுத்தவே இந்த 'ஆபரேஷன் கொங்கு' நடத்தப்படுவதாக அரசியல் விமர்சகர்கள் கருதுகின்றனர்.

தேர்தலுக்குப் பின்: இதுவரை தவெகவில் இணைந்தவர்கள் எத்தனை பேர்?

சட்டசபைத் தேர்தல் முடிவுகள் வெளியாகி, தவெக கூட்டணி ஆதரவோடு ஆட்சி அமைத்துள்ள இந்தச் குறுகிய காலக்கட்டத்தில், மாற்றுக்கட்சிகளில் இருந்து தவெகவுக்கு வரும் தலைவர்களின் எண்ணிக்கை நாளுக்கு நாள் எகிறி வருகிறது.

தேர்தலுக்குப் பிந்தைய தற்போதைய நிலவரப்படி (ஆதாரங்களின் தோராயக் கணக்கு):

முன்னாள் அமைச்சர்கள் & மாவட்டச் செயலாளர்கள்: அதிமுக, திமுக உள்ளிட்ட முக்கியக் கட்சிகளில் இருந்து இதுவரை 3-க்கும் மேற்பட்ட முன்னாள் அமைச்சர்கள் மற்றும் மாவட்ட அளவிலான முக்கியப் பொறுப்பாளர்கள் தவெகவில் இணைந்துள்ளனர்.

அதிமுக மற்றும் பிற கட்சி நிர்வாகிகள்: கொங்கு மற்றும் தென் மாவட்டங்களில் இருந்து மட்டும் இதுவரை 500-க்கும் மேற்பட்ட முக்கிய நிர்வாகிகள் (ஒன்றியச் செயலாளர்கள், கவுன்சிலர்கள், வார்டு பொறுப்பாளர்கள்) தவெகவில் ஐக்கியமாகியுள்ளனர்.

அடிப்படை உறுப்பினர்கள்: தேர்தல் வெற்றிக்குப் பிறகு தமிழகம் முழுவதும் மாற்றுக்கட்சிகளைச் சேர்ந்த சுமார் 25,000-க்கும் மேற்பட்ட தொண்டர்கள் மற்றும் இளைஞர்கள் தவெகவின் கொள்கைகளை ஏற்கும் வகையில் தங்களை உறுப்பினர்களாக இணைத்துக் கொண்டுள்ளனர்.

அரசியல் முக்கியத்துவம்:

ஆட்சி அமைத்த ஒரு வார காலத்திற்குள்ளேயே, எதிர்க்கட்சியான அதிமுகவின் கோட்டையாகக் கருதப்படும் கொங்கு மண்டல விக்கெட்டுகளை தவெக அடுத்தடுத்து வீழ்த்தி வருவது, வரவிருக்கும் உள்ளாட்சித் தேர்தலிலும், டெல்லி நோக்கிய தவெகவின் பயணத்திலும் அக்கட்சிக்கு மிகப்பெரிய உந்துசக்தியாக அமையும் என எதிர்பார்க்கப்படுகிறது. மேலும் தற்போது உள்ளாட்சி தேர்தல் நடைபெறவுள்ள நிலையில் அதிமுக, திமுகவில் இருந்து ஏராளமானோர் தவெகவில் இணைகிறார்கள்.