இந்த தேர்தல் பாஜகவிற்கும் திமுகவிற்கும்.. இடையே நடைபெறும் யுத்தம்.. திருமாவளவன் பேச்சு

சேலம்: தமிழ்நாடு சட்டசபை தேர்தல் பாஜகவுக்கும் திமுகவுக்கும் இடையே நடைபெறும் யுத்தம் என்று குறிப்பிட்டுள்ள விசிக தலைவர் திருமாவளவன், தமிழகத்தை ஒட்டுமொத்தமாக பாஜகவிடம் அதிமுக அடகு வைத்துள்ளது, அதை மீட்க நடைபெறும் தேர்தல் இது என்று அவர் தெரிவித்தார்.

சேலம் மாவட்டத்தில் மு.க.ஸ்டாலின் தலைமையிலான பொதுக்கூட்டம் நடைபெற்று வருகிறது. இதில் திமுக மற்றும் கூட்டணிக் கட்சி வேட்பாளர்களை ஆதரித்து ஒரே மேடையில் ஸ்டாலின், ராகுல் காந்தி உள்ளிட்ட கூட்டணிக் கட்சித் தலைவர்கள் பிரசாரம் செய்யவுள்ளனர்.

இந்தப் பொதுக்கூட்டத்தில் பேசிய விடுதலை சிறுத்தைகள் தலைவர் திருமாவளவன், "இரண்டு கூட்டணிக் கட்சிகளுக்கு இடையே நடைபெறும் சராசரி தேர்தலாக இதை பார்த்துவிட வேண்டாம். இந்தத் தேர்தல் வருகாலத்தைக் காப்பதற்கு நடைபெறும் தேர்தல். தமிழகத்தை ஒட்டுமொத்தமாக பாஜகவிடம் அதிமுக அடகு வைத்துள்ளது, அதை மீட்க நடைபெறும் தேர்தல்தான் இது.

அதிமுக கூட்டணி ஒரு சந்தர்ப்பவாத கூட்டணியாகும். பேரம் பேசி அதிமுகவுடன் பாஜக கூட்டணி அமைத்துள்ளது. ஆனால் திமுக கூட்டணி அப்படியல்ல. நாடாளுமன்ற தேர்தலிலிருந்து ஒன்றாக இணைந்து பயணித்துக் கொண்டிருக்கிறோம். சிஏஏ, விவசாய சட்டங்கள் போன்றவற்றில் இணைந்து போராடியுள்ளோம்.

கடந்த 5 ஆண்டுகளாக தமிழ்நாடு ஒரு அங்குலம் கூட வளர்ச்சி அடையவில்லை. திமுக கூட்டணிக்கு எதிராக நிற்கும் வலுமை அதிமுகவிற்கு இல்லை. அதிமுக நீர்த்துப் போய்விட்டது, பாமக விலை போகிவிட்டது. அதிமுக முகமூடியைக் கொண்டு தமிழ்நாட்டில் நுழைய பாஜக முயல்கிறது. அதிமுக, பாமக என்று யாருக்கு வாக்களித்தாலும் அது பாஜகவிற்கே செல்லும்.

இந்தத் தேர்தல் பாஜகவுக்கும் திமுகவுக்கும் இடையே நடைபெறும் யுத்தம். தமிழ்நாட்டில் மதவாதத்தைப் புகுத்தி மக்களைப் பிளவுபடுத்த பாஜக முயல்கிறது. தமிழ்மொழி, தமிழ் இனம், சமூக நீதி, ஜனநாயகம் என்று அனைத்தையும் காக்க நடைபெறும் தேர்தல் இது.

ஒட்டுமொத்த இந்தியாவே திரும்பிப் பார்க்கும் வகையில் தேர்தல் முடிவுகள் இருக்க வேண்டும். தமிழ்நாட்டில் உள்ள அனைத்து தொகுதிகளிலும் மதச்சார்பற்ற முற்போக்கு கூட்டணி வெற்றி பெறும். திமுக தலைவர் ஸ்டாலின் முதல்வராகப் பொறுப்பேற்பார். தமிழ்நாட்டை மட்டுமல்ல ஒட்டுமொத்தமாக இந்தியாவையே பாதுகாக்க அச்சாரமாக இந்தத் தேர்தல் அமையும்" என்று அவர் தெரிவித்தார்.

English summary

VCK Chief Thirumavalavan speech in DMK Maanadu.