மேட்டூர் அனல் மின் நிலையத்தில் கோர விபத்து.. 2 பேர் சடலமாக மீட்பு! மற்றவர்கள் கதி என்ன?

Updated: Thursday, December 19, 2024, 19:11 [IST]

Subscribe to Oneindia Tamil

சேலம்: சேலம் மாவட்டம் மேட்டூர் அனல் மின் நிலையத்தில் நிலக்கரி சேமிப்பு தொட்டி உடைந்து விழுந்து பெரும் விபத்து ஏற்பட்டுள்ளது. நிலக்கரி சேமிப்பு தொட்டி விழுந்து 5 பேர் காயமடைந்த நிலையில் 2 பேர் சடலமாக மீட்கப்பட்டு உள்ளதாக தகவல் வெளியாகியுள்ளது. மீட்புப் பணிகள் தொடர்ந்து வருகின்றன.

சேலம் மாவட்டம் மேட்டூர் 840 மெகாவாட் அனல் மின் நிலையத்தின் ஆறாவது யூனிட்டில் இன்று திடீர் விபத்து ஏற்பட்டது. நிலக்கரி எரிகலனில் நிலக்கரி கொண்டு செல்லும் கண்டெய்னர் பெல்ட் கழன்று நிலக்கடி தொட்டி விழுந்ததாக கூறப்படுகிறது. இதனால் அங்கு பெரும் புகையுடன் தீ பிடித்தது. உடனடியாக அங்கு வந்த தீயணைப்பு வீரர்கள் தீயைக் கட்டுக்குள் கொண்டு வந்தனர்.

நிலக்கரி சேமிப்பு தொட்டி விழுந்த விபத்தில் படுகாயம் அடைந்த 5 தொழிலாளர்களை தீயணைப்பு வீரர்கள் மீட்டு சிகிச்சைக்காக மேட்டூர் அரசு மருத்துவமனையில் அனுமதித்துள்ளனர். இந்த விபத்தில் ஸ்ரீகாந்த், மனோஜ் குமார், சீனிவாசன், முருகன், கௌதம் ஆகிய ஐந்து பேர் படுகாயம் அடைந்த நிலையில் அவர்கள் மருத்துவமனையில் அனுமதிக்கப்பட்டுள்ளனர்.

மேலும் அங்கு பணியில் இருந்த மேலும் சிலரை கண்டுபிடிக்க முடியாததால் நிலக்கரியை அப்புறப்படுத்தி, காணாமல் போன 2 தொழிலாளர்களை தேடும் பணியில் தீயணைப்பு வீரர்கள் தீவிரமாக ஈடுபட்டு வந்தனர். இந்நிலையில், 2 பேரின் உடல்கள் சடலமாக மீட்கப்பட்டுள்ளதாக தகவல் வெளியாகியுள்ளது.

மேட்டூர் அனல்மின் நிலைய விபத்தில் வெங்கடேசன், பழனிச்சாமி ஆகிய 2 பேர் உயிரிழந்துள்ளதாக தெரியவந்துள்ளது. நிலக்கரி குவியலில் மேலும் சிலர் சிக்கியிருக்கலாம் எனக் கருதப்படுவதால் மீட்பு பணிகள் தொடர்ந்து வருகின்றன.

இந்த விபத்தால் அனல் மின் நிலையத்தில் மின் உற்பத்தி நிறுத்தப்பட்டுள்ளது. இந்த விபத்திற்கான காரணம் குறித்து கூடுதல் தகவல்கள் விரைவில் தெரியவரும். நிலக்கரியை தேக்கி வைக்கும் பங்கர் டேங்க் சரிந்து விழுந்ததில் இந்த விபத்து ஏற்பட்டதாக முதற்கட்ட தகவல் வெளியாகி உள்ளது. அந்த இடத்தில் எட்டு பேர் பணியாற்றி வந்ததாகவும், 5 பேர் மருத்துவமனையில் சிகிச்சை பெற்று வரும் நிலையில் இருவர் சடலமாக மீட்கப்பட்டுள்ளனர்.