‘ஜனநாயகன்’ டிக்கெட்டை அதிக விலைக்கு விற்று மோசடி செய்தவர் தவெக வேட்பாளரா? சொந்த கட்சியினரே எதிர்ப்பு

Updated: Wednesday, April 1, 2026, 11:51 [IST]

Subscribe to Oneindia Tamil

சேலம்: சேலம் மாவட்டம் கொளத்தூருக்கு நிர்வாகிகளை சந்திக்க வந்த மேட்டூர் தவெக வேட்பாளர் செல்வத்தை, ஊருக்குள் நுழைய விடாமல் தவெகவினர் தடுத்து வாக்குவாதத்தில் ஈடுபட்ட சம்பவம் பரபரப்பை ஏற்படுத்தி உள்ளது.

Election Tension in TVK Candidate Selvam Confronted by Own Party Members

விஜய் நடித்துள்ள ஜனநாயகன் படத்திற்கான அனைத்து பணிகளையும் முடித்து கடந்த ஜனவரி மாதம் ரிலீஸுக்கு திட்டமிடப்பட்டிருந்தது. படத்தை தணிக்கைக்கு அனுப்பிய படக்குழு இதுவரை தணிக்கை சான்றிதழ் கிடைக்கவில்லை. சென்சார் சிக்கலால் ஜனவரியில் திட்டமிட்டபடி படம் வெளியாகவில்லை.

ஜனநாயகன் படத்திற்கு தணிக்கைச் சான்றிதழ் வழங்கக் கோரி சென்னை ஐகோர்ட்டில் தயாரிப்பு நிறுவனம் அவசர வழக்கு தொடர்ந்தது. பின்னர், வழக்கை வாபஸ் பெற்றுவிட்டு, முறையீட்டு தீர்ப்பாயம் சென்றுள்ளது. தேர்தலுக்குப் பிறகு ஜனநாயகன் திரைப்படம் வெளியாகும் என எதிர்பார்க்கப்படுகிறது.

இந்நிலையில், தவெக கட்சியினர், சட்டசபை தேர்தல் பணிகளில் தீவிரமாக ஈடுபட்டுள்ளனர். அண்மையில், 234 தொகுதிகளுக்கும் வேட்பாளர்களை அறிவித்தார் தவெக தலைவர் விஜய். பெரம்பூர், திருச்சி கிழக்கு ஆகிய 2 தொகுதிகளில் போட்டியிடுகிறார் விஜய்.

இந்நிலையில், சேலம் மாவட்டம் மேட்டூர் சட்டசபை தொகுதி வேட்பாளர் செல்வம், மேட்டூர் தொகுதிக்கு உட்பட்ட கொளத்தூர் பகுதி நிர்வாகிகளை சந்திக்க வருகை தந்தார். அவரை ஊருக்குள் நுழைய விடாமல் தவெகவினர் தடுத்து வாக்குவாதத்தில் ஈடுபட்ட சம்பவம் பரபரப்பை ஏற்படுத்தி உள்ளது.

'ஜனநாயகன்' படத்திற்கு தாங்கள் முன்பதிவு செய்த டிக்கெட்டுகளை வாங்கி, தங்களிடமே அதிக விலைக்கு விற்றதாகவும், ஒருதலைப்பட்சமாக செயல்படுவதாகவும் தவெக வேட்பாளர் செல்வம் மீது குற்றம்சாட்டியுள்ளனர். தவெக நிர்வாகிகள் பலர் திரண்டு வாக்குவாதத்தில் ஈடுபட்டதால் அப்பகுதியில் பரபரப்பு ஏற்பட்டது.

வெளியாகாத ஜனநாயகன் படத்தின் டிக்கெட்களை அதிக விலைக்கு விற்றதாக தவெக வேட்பாளர் மீது, அவர்களின் கட்சியினரே குற்றம்சாட்டி தகராறில் ஈடுபட்டிருப்பது சேலம் மாவட்ட தவெகவில் சலசலப்பை ஏற்படுத்தியுள்ளது.