10 லட்சம் பேருக்கு மட்டன் பிரியாணி, சிக்கன்65, பிரட் அல்வா! ருசி ருசியாய் திமுக இளைஞரணி மாநாடு மெனு

சேலம்: சேலத்தில் நடைபெறும் திமுக இளைஞரணி மாநாட்டு திடலில் 10 லட்சம் பேருக்கு மட்டன் பிரியாணி, சிக்கன் 65, பிரட் அல்வா, தயிர் சாதம், ஸ்வீட், காலி பிளவர் சில்லி என ஏராளமான உணவு வகைகள் தயாரிக்கப்பட்டு வருகின்றன.

சமையல் கலைஞர்கள் மட்டும் ஆயிரத்துக்கும் மேற்பட்டோர் உணவு சமைக்கும் பணிகளில் ஈடுபடுத்தப்பட்டுள்ளனர். 3 லட்சம் பேருக்கு ஒரு டீம் என்று மூன்று டீம்களாக பிரிக்கப்பட்டு பிரியாணி தயாரிக்கப்படுகிறது. அதேபோல் சிக்கன் 65, பிரட் அல்வா ஆகிய இரண்டையும் தயாரிக்க தனி டீம் வேலை பார்த்து வருகிறது. இதுமட்டுமல்லாமல் சைவம் சாப்பிடுபவர்களுக்கு வெஜ் பிரியாணி, தயிர் சாதம், காலி பிளவர் சில்லி என எக்கச்சக்க உணவு வகைகள் சமைக்கப்படுகின்றன.

வில்லேஜ் குக்கிங் சேனலில் கூறுவதை போல் ''இன்னைக்கு ஒரு புடி'' என்கிற வகையில் திமுக இளைஞரணி நிர்வாகிகளுக்கு அறுசுவை விருந்து காத்திருக்கிறது. நாளை காலை 10 மணிக்கெல்லாம் பிரியாணி தயாராக இருக்க வேண்டும் என திமுக மேலிடம் கேட்டிருப்பதால், இரவு 2 மணி முதல் பிரியாணி சமையல் தொடங்கவுள்ளது. சீரக சம்பா அரிசியில் திண்டுக்கல் ஸ்டைல் மட்டன் பிரியாணி சமைக்கப்படுகிறது. பிரட் அல்வா ஊற வேண்டும் என்பதால் அந்த உணவுப் பண்டம் மட்டும் இன்று மாலையே சமைத்து ரெடி செய்யப்பட்டுவிட்டது.

மற்றப்படி பிரியாணி, சிக்கன் 65 போன்ற உணவு பண்டங்கள் அதிகாலை முதல் சமைக்கப்படவுள்ளன. காலை 9 மணிக்கெல்லாம் பிரியாணி ரெடி என்று சொல்லும் அளவுக்கு வேலைகள் வேகமாக நடைபெற்று வருகின்றன. அதிமுக மாநாட்டில் தொண்டர்களுக்கும் புளிசாதம், தயிர்சாதம் வழங்கப்பட்ட நிலையில் கமகமக்கும் பிரியாணி வழங்குகிறார் அமைச்சர் உதயநிதி ஸ்டாலின்.

பந்தியில் அமர்ந்து சாப்பிட விரும்புபவர்கள் சாப்பிடலாம் அல்லது பார்சல் வாங்கிச் சென்று சாப்பிட விரும்புபவர்கள் சாப்பிடலாம் என்கிற வகையில் ஏற்பாடுகள் பக்காவாக செய்யப்பட்டுள்ளன. 10 லட்சம் பேருக்கு இவர்கள் சமைத்தாலும் நாளை முகூர்த்த நாள் என்பதால் மாநாடுக்கு வருகை தருவோர் எண்ணிக்கை 5 லட்சம் வரை தான் இருக்கும் என எதிர்பார்க்கப்படுகிறது.

English summary

At the DMK Youth Conference in Salem, many types of food like Mutton Biryani, Chicken 65, Bred Alva, Curd Rice, Sweet, Cauliflower Chilli are being prepared for 10 lakh people.