இனி கடலூர் ஈஸியா செல்லலாம்.. சேலம் - விருத்தாச்சலம் டெமு ரயில் நீட்டிப்பு.. ரயில்வே வாரியம் ஒப்புதல்

சேலம்: சேலம் - விருத்தாச்சலம் இடையே டெமு ரயில் இயக்கப்பட்டு வரும் நிலையில் தற்போது கடலூர் துறைமுக சந்திப்பு வரை நீட்டிப்பு செய்ய ரயில்வே வாரியம் ஒப்புதல் வழங்கியுள்ளது.

சேலம் - விருத்தாச்சலம் இடையே டெமு பயணிகள் ரயில் இயக்கப்பட்டு வருகிறது. இந்த ரயிலை கடலூர் வரை நீட்டிப்பு செய்ய வேண்டும் என்று தொடர்ந்து கோரிக்கைகள் வைக்கப்பட்டன.

இந்நிலையில் தான் சேலம் - விருத்தாச்சலம் டெமு பயணிகள் ரயில் கடலூர் துறைமுக சந்திப்பு வரையிலான நீட்டிப்புக்கு ரயில்வே வாரியம் ஒப்புதல் அளித்துள்ளது. அதன்படி சேலத்தில் இருந்து புறப்படும் டெமு ரயில் கடலூர் துறைமுக சந்திப்பு செல்லும். பிறகு அங்கிருந்து சேலம் புறப்பட்டு செல்லும்.

அதன்படி சேலம் -விருத்தாச்சலம் டெமு பயணிகள் ரயில் (வண்டி எண்: 06122) மே மாதம் 2ம் தேதியில் இருந்து கடலூர் துறைமுக சந்திப்பு வரை செல்லும். அதன்படி சேலத்தில் இருந்து மாலை 6.20 மணிக்கு புறப்படும் டெமு ரயில் இரவு 9 மணிக்கு விருத்தாச்சலம் சந்திப்பு ரயில் நிலையத்தை அடையும்.

பிறகு விருத்தாச்சலத்தில் இருந்து இரவு 9.10 மணிக்கு புறப்படும் ரயில் இரவு 9. 25 மணிக்கு ஊத்தங்கால் மங்கலம் சென்று இரவு 9.26 மணிக்கு புறப்படும். இந்த ரயில் நெய்வேலியை இரவு 9.33 மணிக்கும், வடலூரை 9.42 மணிக்கும், குறிஞ்சிப்பாடியை 9.50 மணிக்கும் அடையும். அதன்பிறகு கடைசியாக 10.25 மணிக்கு கடலூர் துறைமுக சந்திப்பு ரயில் நிலையத்தை டெமு ரயில் சென்றடையும்.

அதேபோல் மறுமார்க்கமாக விருத்தாச்சலம் - சேலம் டெமு பயணிகள் ரயில் (06121) மே மாதம் 3ம் தேதி முதல் கடலூரில் இருந்து சேலத்துக்கு புறப்படும். அதன்படி கடலூரில் இருந்து காலை 5 மணிக்கு புறப்படும் ரயில் 5.18 மணிக்கு குறிஞ்சிப்பாடி, 5.26 மணிக்கு வடலூர், 5.35 மணிக்கு நெய்வேலி, 5.43 மணிக்கு ஊத்தங்கால் மங்கலத்தை அடையும்.

அதன்பிறகு 6.05 மணிக்கு விருத்தாச்சலம் வரும் ரயில் 10 நிமிடம் நிறுத்தப்படும். அங்கிருந்து மீண்டும் 6.15 மணிக்கு புறப்படும் ரயில் காலை 9.05 மணிக்கு சேலம் சந்திப்பை அடையும் என தெரிவிக்கப்பட்டுள்ளது. இந்த டெமு ரயில் நீட்டிப்பால் கடலூர் மக்கள் ஹேப்பியாகி உள்ளனர். இருப்பினும் கூட இந்த டெமு ரயில் திருப்பாதிரிப்புலியூர் ரயில் நிலையம் செல்லாது.

இந்த திருப்பாதிரிப்புலியூர் ரயில் நிலையம் தான் கடலூர் பஸ் நிலையம் அருகே அமைந்துள்ளளது. மாறாக கடலூர் துறைமுக சந்திப்பு ரயில் நிலையம் சுமார் 4 கிலோமீட்டர் தொலைவில் அமைந்துள்ளது. இதனால் டெமு ரயிலை கடலூர் துறைமுக சந்திப்பு ரயில் நிலையத்தில் இருந்து திருப்பாதிரிப்புலியூர் வரை நீட்டிப்பு செய்தால் கடலூர் மக்களுக்கு இன்னும் வசதியாக இருக்கும் என்பது அங்குள்ளவர்களின் கோரிக்கையாக உள்ளது.

English summary

Railway board has approved the extension of Salem - Viruddhachalam DEMU Train to extend it up to Cuddalore port junction.