ஆர்.கே.நகர் விசிக வேட்பாளர் வசந்தி தேவியின் சொத்து மதிப்பு ரூ.2.58 கோடி

சென்னை: ஆர்.கே.நகர் தொகுதி விடுதலைச் சிறுத்தைகள் கட்சி வேட்பாளர் வசந்திதேவிக்கு ரூ. 2.58 கோடி மதிப்பிலான அசையும், அசையாச் சொத்துக்கள் உள்ளதாக தெரியவந்துள்ளது.

சட்டசபைத் தேர்தலில் ஆர்.கே.நகர் தொகுதியில் முதல்வர் ஜெயலலிதாவை எதிர்த்து விடுதலை சிறுத்தைகள் கட்சி வேட்பாளராக களமிறங்குகிறார் கல்வியாளரும் முன்னாள் துணைவேந்தருமான முனைவர் வே. வசந்திதேவி.

அவர் தனது வேட்புமனுவை புதன்கிழமை தாக்கல் செய்தார். தண்டையார்பேட்டையில் உள்ள மண்டல அலுவலகத்துக்கு கூட்டணி கட்சி தொண்டர்களுடன் வந்திருந்த வசந்திதேவி, தொகுதி தேர்தல் அலுவலரான பத்மஜா தேவியிடம் தனது வேட்பு மனுவை அளித்தார்.

வேட்புமனுவுடன் அவர் தாக்கல் செய்துள்ள பிரமாண பத்திரத்தில் குறிப்பிட்டுள்ளபடி, தன்னிடம் ரூ. 58.31 லட்சம் மதிப்பில் அசையும் சொத்துக்கள் உள்ளதாகவும். இதில் ரூ. 3.56 லட்சம் மதிப்பிலான ஹூண்டாய் கார் ஒன்றும், ரூ. 1.61 லட்சம் மதிப்பில் 56 கிராம் தங்க நகைகளும், ரூ. 1.25 லட்சம் மதிப்பில் 3 கிலோ வெள்ளி பொருள்களும் வைத்திருப்பதாகவும் தெரிவித்துள்ளார்.

மேலும் திண்டுகல்லில் ரூ. 1 கோடி மதிப்பிலான 5,400 சதுர அடி பரப்பளவு கொண்ட வீடு ஒன்றும், சென்னையில் ரூ. 1 கோடி மதிப்பிலான அடுக்குமாடி குடியிருப்பு ஒன்று என மொத்தம் ரூ. 2 கோடி மதிப்பில் அசையா சொத்துக்களை வசந்தி தேவி வைத்திருக்கிறார். அவரது கல்வித் தகுதி.. எம்.ஏ., பிஎச்.டி., என்றும் தெரிவிக்கப்பட்டுள்ளது.

English summary

According to the affidavits, VCK RK Nagar candidate vasanthi devi's assets are worth Rs 2.58 crore