சென்னையில் மாயமாகும் பச்சிளம் குழந்தைகள்... நடவடிக்கை எடுக்கக் கோரி நடிகர் பார்த்திபன் புகார் !

சென்னை: சாலையோரம் வசிக்கும் மக்களுடைய குழந்தைகளின் பாதுகாப்பை உறுதிப்படுத்த நடவடிக்கை எடுக்கக் கோரி, சென்னை மாநகர காவல் ஆணையரிடம், நடிகர் பார்த்திபன் புகார் மனு அளித்துள்ளார்.

சென்னையில் சாலையோரம் வசிப்போரின் குழந்தைகள் காணாமல் போவது தொடர் கதையாகி வருவதாக தமது புகாரில் குறிப்பிட்டுள்ளார். கடந்த 30 நாட்களில் 2 கைக் குழந்தைகள் காணாமல் போயுள்ளதாகவும், அவர்கள் இதுவரை கண்டுபிடிக்கப்படவில்லை என்றும் தெரிவித்துள்ளார்.

சாலையோரம் வசிப்போர் வேலைக்கு சென்றுவிடும்போது, அவர்களது குழந்தைகள் பாதுகாப்பின்றி விடப்படுவதாகவும், இதனால், அவர்களின் பாதுகாப்பை உறுதிப்படுத்த காவல்துறை உரிய நடவடிக்கை எடுக்க வேண்டும் என்றும் வலியுறுத்தியுள்ளார்.

பின்னர் செய்தியாளர்களிடம் பேசிய பார்த்திபன், செய்தித்தாள்களில் நிறைய செய்திகள் இருக்கும் அதில் சில செய்திகள் சிலரை பாதிக்கும். என்னையும், லதா ரஜினிகாந்தையும் தெருவோர குழந்தைகள் காணாமல் போவது குறித்த செய்தி மிகவும் பாதித்தது. இதில் கொஞ்சம் அவசர நடவடிக்கையாக கவனம் செலுத்துமாறு காவல்துறையிடம் கோரிக்கை விடுத்து இருக்கிறோம்.

இந்த இடத்தில் தனித்து போட்டியிடமால் கூட்டணியாக போட்டியிடலாம் என்று முடிவு செய்து இருக்கிறோம். பார்த்திபன் மனிதநேய மன்றம், லதா ரஜினிகாந்தின் தயா ஃபவுண்டேஷன், எக்ஸ்‌நோரா நிர்மல் மற்றும் இன்னும் பல என்‌ஜி‌ஓ-கள் இணைந்து இதற்கான ஒரு விழிப்புணர்வு கொண்டு வர வேண்டும் என்று இணைந்து இருக்கிறோம்.

இது குறித்து முதல்வரை சந்திக்க நேரம் கேட்டு இருக்கிறோம் "அம்மா குழந்தைகள் நல காப்பகம்" என்று தொடங்கலாம் என்று கேட்டு இருக்கிறோம் என்றார். மேலும் உரிய நடவடிக்கை எடுப்பதாக, காவல் ஆணையர் டி.கே. ராஜேந்திரன் தெரிவித்ததாகவும் குறிப்பிட்டார்.

English summary

Actor parthipan complaints to chennai city Commissioner for save road side children