அட்சய திருதியைக்கு பிறகும் தங்கம் வாங்க போறீங்களா ? இதுதான் சரியான நேரம்! விலை நிலவரம் தெரியுமா?

சென்னை: தங்கம், வெள்ளி நகைகளை வாங்க செல்வதற்கு முன்பு அதன் விலையை தெரிந்து கொள்ளுங்கள்.

பொன் நகையைவிட உந்தன் புன்னகையே போதும்.. இதை கேட்டு கேட்டு காதுகள் புளித்துவிட்டனவா? பொன் நகையை விட அழகாக ஜொலிக்கும் கவரிங் நகைகள் எத்தனை வந்துவிட்டாலும் மண் மீதும் பொன் மீதும் போட்ட காசு சோரம் போனதாக சரித்திரம் இல்லை என்பார்கள்.

அதனால்தான் ஒரு குண்டு மணி தங்கம் வாங்கினாலும் அதனால் நமக்கு இன்றில்லாவிட்டாலும் என்றாவது பலன் கிட்டும். ஆகவேதான் தங்க நகையை வாங்குவதில் மக்கள் ஆர்வம் காட்டுகிறார்கள். இவர்களின் ஆர்வத்தை வியாபாரிகள் தங்களுக்கு சாதகமாக்கிக் கொள்கிறார்கள்.

அட்சய திருதியை நன்னாளில் தங்கம் வாங்கினால் சுபிட்சம் என நகைக் கடைக்காரர்கள் விளம்பரத்திற்காக கொண்டு வந்தது என சிலர் கூறுகிறார்கள். ஆனால் பலர் அன்றைய தினம் தங்கம் வாங்கினால் அடுத்த ஆண்டுக்குள் அந்த நகையை விட சற்று கூடுதலாக வாங்க முடிகிறது. இதை கண்கூடவே பார்த்துள்ளோம் என்கிறார்கள்.

கடந்த சில ஆண்டுகளாக அட்சய திருதியை அன்று நகைக் கடைகள் கவர்ச்சிகரமான விளம்பரத்தை முன் வைத்து தங்கள் வியாபாரத்தை செய்து வருகிறார்கள். அட்சய திருதியை அன்று அதிகாலையே நகைக் கடைகள் திறக்கப்படுகின்றன. மேலும் அன்றைய தினம் தங்கம் வாங்கினால் வெள்ளி இலவசம், செய்கூலி, சேதாரம் இல்லை உள்ளிட்ட விளம்பரங்கள் மக்களை கவரத்தான் செய்கின்றன.

அன்றைய தினம் ஒரு மூக்குத்தி வாங்கிவிட்டு பில் போட இரவு வரை வரிசையில் காத்திருக்கும் சம்பவங்கள் எல்லாம் நடந்துள்ளன. அட்சய திருதியையை முன்னிட்டு தங்கத்தின் விலை தற்போது தொடர்ந்து சரிவை கண்டு வருகிறது. இதனால் மக்கள் தங்கத்தை வாங்க ஆர்வமாக இருக்கிறார்கள். தற்போது மீண்டும் ரூ 45 ஆயிரத்தை தாண்டியுள்ளது ஒரு சவரன் தங்கத்தின் விலை!

நேற்று முன் தினம் தங்கம் விலை சவரனுக்கு ரூ 64 அதிகரித்த நிலையில் இன்றும் அதே விலையே நீடிக்கிறது. 22 காரட் ஆபரணத் தங்கத்தின் விலை எந்த மாற்றமுமின்றி ஒரு கிராம் தங்கம் 5,630 ரூபாயாகவும் ஒரு சவரன் தங்கம் ரூ. 45,040 ஆகவும் விற்பனையாகிறது. 18 காரட் ஆபரணத் தங்கத்தின் விலையும் எந்த மாற்றமும் இல்லாமல் விற்பனையாகிறது.

18 காரட் ஆபரணத் தங்கத்தின் விலை கிராம் ஒன்றுக்கு ரூ 4,612 ஆகவும் ஒரு சவரன் ரூ. 36,896 ஆகவும் விற்பனை செய்யப்படுகிறது. அது போல் வெள்ளியின் விலை மட்டும் கிராம் ஒன்றுக்கு 20 காசுகள் குறைந்து ஒரு கிராம் வெள்ளி ரூ 80.20 எனவும் ஒரு கிலோ வெள்ளி ரூ 80,200 க்கும் விற்பனையாகிறது.

English summary

Are you planning to buy gold and silver ornaments for your beloved one? Then this is for you!