சித்த முன்ன வந்திருக்கப்படாதா மழை சார்... காலையிலேயே ஏங்கிப் போன ஸ்கூல் பசங்க!

Updated: Wednesday, December 10, 2014, 16:14 [IST]

Subscribe to Oneindia Tamil

சென்னை: மீண்டும் ஒரு மழை.. வெப்பம் தணித்த ஒரு ஜில் நாள்.. சென்னை மீண்டும் நனைந்து மகிழ்ந்துள்ளது...

வட கிழக்குப் பருவ மழையின் தொடக்கம் இந்த முறை சற்று சிறப்பாகவே இருந்தது. சென்னையில் தொடர்ந்து நான்கு நாட்களுக்கு மழை வெளுத்துக் கொட்டியது.

ஆனால் அதன் பின்னர் மழைக்கு புரமோஷன் கொடுத்து தென் மாவட்டங்களுக்குத் திருப்பி விட்டு விட்டார் வருண பகவான். வட மாவட்டங்களில் குறைந்து போன மழை தென் மாவட்டங்களை புரட்டிப் போட்டது.. தென் மாவட்ட மண்ணைத் துவட்டிப் போட்டது.

இடையில் வட கடலோரத் தமிழகத்தில் லேசாக எட்டிப் பார்த்தது மழை. இன்று மீண்டும் ஒரு மழை.

நீ பெய்.. நான் பேட் செய்கிறேன்

இது சென்னை மெரீனா கடற்கரையில் கண்ட காட்சி. கருத்த மேகங்கள் கொளுத்து நிற்க.. தடித்த பேட் பிடித்து கிரிக்கெட் விளையாடும் ஒரு இளசு இது.

ஓ மேகமே

சென்னையில் பல நாட்களாக மழை இல்லை. மாறாக குளிர் நிலவி வந்தது. அதிகாலையிலும், இரவிலும் நல்ல பனி பெய்து வந்தது.

குளிரை மாற்றிய மழை

இந்த நிலையில் கடந்த 2 நாட்களாக நல்ல காற்று வீசி வந்தது. நேற்று பகலில் நல்ல வெயிலும் அடித்தது. ஆனால் நகரின் சில பகுதிகளில் லேசான தூறலைப் போட்டு விட்டுச் சென்றது.

இரவில் மழை

இந்த நிலையில் நேற்று இரவு நகரின் பல பகுதிகளில் நல்ல மழை பெய்தது. அதிகாலையில் பல இடங்களை நனைத்துச் சென்றது. பகலில் பல பகுதிகளை பதம் பார்த்தது இந்த கார்த்திகை மழை.

தீபத்தைத் தவற விட்டு

வழக்கமாக பெரிய தீபம் எனப்படும் கார்த்திகை நாளுக்கு முன்பு நல்ல மழை பெய்யும் என்பார்கள். ஆனால் சென்னையில் இந்த முறை மழை இல்லாமல் இருந்தது. ஆனால் இன்று பெய்த மழை மக்களின் ஏக்கத்தைத் தீர்த்துச் சென்றுள்ளது.

இப்பப் பார்த்து வந்திருச்சே

இன்று காலை மழை பெய்த நேரம் பல பள்ளிப் பிள்ளைகளைக் கடுப்பாக்கி விட்டது. அதாவது புறப்பட்டு வெளியே போன பிறகு மழை வந்ததால் வேறு வழியில்லாமல் பள்ளிக்குப் போக நேரிட்டு விட்டது பிள்ளைகளுக்கு.