கருணாநிதியை எதிர்த்து அதிகம் மோதிய கட்சி எது தெரியுமா?

Updated: Tuesday, April 12, 2016, 18:43 [IST]

Subscribe to Oneindia Tamil

சென்னை: திமுக தலைவர் கருணாநிதியை எதிர்த்து அதிக வேட்பாளர்களை நிறுத்திய "பெருமை" காங்கிரஸ் வசம் உள்ளது. அதற்கு அடுத்த இடம்தான் அதிமுகவுக்குக் கிடைத்துள்ளது.

திமுக தலைவர் கருணாநிதி 14வது முறையாக சட்டசபைத் தேர்தலைச் சந்திக்கவுள்ளார். இதுவரை தோல்வியையே சந்தித்திராத கருணாநிதிக்கு 14வது தேர்தலும் வெற்றியாகவே முடியும் என்பதை சொல்லித் தெரிய வேண்டிய அவசியமில்லை.

என்னதான் திமுகவின் பரம வைரி அதிமுக என்றாலும் கூட பலமுறை தோழமைக் கட்சியாக இருந்துள்ள, தற்போதும் கூட்டணிக் கட்சியாக இருக்கக் கூடிய காங்கிரஸ்தான் கருணாநிதிக்கு எதிராக அதிக வேட்பாளர்களை நிறுத்திய கட்சியாக இருக்கிறது என்பது சுவாரஸ்யமானது.

6 முறை மோதல்

கருணாநிதிக்கு எதிராக 6 முறை வேட்பாளர்களை நிறுத்தியுள்ளது காங்கிரஸ். ஆறு முறையும் அவரே வென்றுள்ளார். காங்கிரஸ் கட்சியால் 2வது இடத்தை மட்டுமே பிடிக்க முடிந்தது.

நம்பர் 2 அதிமுக

அதிமுக இந்த வரிசையில் 2வது இடத்தில்தான் வருகிறது. அக்கட்சி, கருணாநிதிக்கு எதிராக இதற்கு முன்பு 4 முறை வேட்பாளர்களை நிறுத்தியுள்ளது அதிமுக. இப்போது 5வது முறையாக வேட்பாளரை (பன்னீர் செல்வம்) அறிவித்துள்ளது.

2 முறை முஸ்லீம் வேட்பாளர்கள் மோதல்

2 முறை முஸ்லீம் வேட்பாளர்கள் கருணாநிதிக்கு எதிராக மோதி 2ம் இடத்தைப் பிடித்தனர். 1989ம் ஆண்டு முஸ்லீம் லீக் கட்சியும், 2006ம் ஆண்டு தாவூத் மியா கானும் கருணாநிதியை எதிர்த்து மோதி 2வது இடத்தைப் பிடித்தனர்.

கருணாநிதியுடன் மோதிய காங்கிரஸ்காரர்கள்

கே.ஏ. தர்மலிங்கம் (குளித்தலை), பரிசுத்த நாடார் (தஞ்சாவூர்), எஸ்.ஜி. விநாயகமூர்த்தி (சைதாப்பேட்டை), ராமலிங்கம் (சைதாப்பேட்டை), நெல்லை கண்ணன் (சேப்பாக்கம்), தாமோதரன் (சேப்பாக்கம்).