மீத்தேன் திட்டத்தால் சுற்றுச்சூழல் பாதிக்கும்: எச்சரித்த மேதா பட்கர் – ஆதரவு தெரிவித்த வைகோ

சென்னை: மீத்தேன் எரிவாயு எடுக்கும் திட்டத்தால் காவிரி டெல்டா மாவட்டங்களில் சுற்றுச்சூழல் பாதிப்பு அடையும் என சமூக சேவகர் மேதா பட்கர் எச்சரித்துள்ளார்.

நாகை மாவட்டம், சீர்காழியை அடுத்த பழையபாளையம் என்ற இடத்தில், ஓ.என்.ஜி.சி.,யின் மீத்தேன் எடுக்கும் பிளான்ட் உள்ளது. இந்த பிளான்ட்டை, சமூக ஆர்வலர் மேதா பட்கர் நேற்று பார்வையிட்டார்.

முன்னதாக சிதம்பரத்தில் செய்தியாளர்களிடம் மேதா பட்கர் பேசினார். அப்போது அவர், தஞ்சாவூர், திருவாரூர், நாகை மாவட்டங்களில் மீத்தேன் எடுப்பு திட்டத்தை செயல்படுத்துவதால் நிலத்தடி நீர்மட்டம் குறையும், குடியிருப்பு பகுதியில் உள்ள வீடுகளை காலி செய்யும் நிலை ஏற்படும். காவிரி டெல்டா பகுதியில் சுமார் 20 லட்சம் ஏக்கர் விவசாயம் அழியும் நிலை ஏற்படும். இதனால் இந்த பகுதி மக்கள் பெரும் பாதிப்பு அடைவார்கள்.

பூமியில் 2 ஆயிரம் அடி துளை போட்டு ரசாயனத்தை செலுத்தி பாறைகளை வெடிக்க வைத்து மீத்தேன் எடுக்கப்படும். இதனால் சுற்றுச்சூழல் பெரும் பாதிப்பு அடையும். எனவேதான் மேற்கத்திய நாடுகள் இத்திட்டத்தை நிறுத்திவிட்டன.

வளர்ச்சி என்று கூறி மத்திய அரசு இத்திட்டத்தை பற்றி மக்களிடம் கருத்து கேட்காமல் செயல்படுத்துகிறது. இத்திட்டம் பற்றி விவரங்கள், ஆய்வுகள் அனைத்தையும் தமிழில் மொழி மாற்றம் செய்து, கிராம சபைகளில் மக்கள் தெரிந்து கொள்ளுமாறு அரசு ஏற்பாடு செய்ய வேண்டும்.

தமிழக அரசு மக்கள் நலன் கருதி மீத்தேன் எரிவாயு திட்டத்தை தடுத்து நிறுத்த வேண்டும். நிலத்தை கையகப்படுத்தும் அவரச சட்டத்தின் மீது பொது விசாரணை நடத்த வேண்டும். நதிநீர் பங்கீட்டில் மாநில அரசுகளுக்கு இடையே உள்ள ஒப்பந்தங்களை மதிக்க வேண்டும் என்று கூறினார்.

பின்னர் சீர்காழி அருகேயுள்ள பழையபாளையம், திருநகரி ஆகிய கிராமங்களில் மீத்தேன் திட்ட எதிர்ப்புக் கூட்டமைப்பு ஒருங்கிணைப்பாளர் ஜெயராமனுடன் மேதா பட்கர் ஆய்வு மேற்கொண்டார்.

வைகோ - மேதாபட்கர் சந்திப்பு

இதனிடையே தஞ்சை சுற்றுப்பயணத்தில் இருந்த மேதா பட்கர், வழக்கு தொடர்பாக சண்டிகர் செல்வதற்காக இன்று சென்னை விமான நிலையத்துக்கு வந்தார். அவரை ம.தி.மு.க. பொதுச்செயலாளர் வைகோ சந்தித்து, மீத்தேன் எரிவாயு திட்டம் குறித்து சுமார் 1 மணி நேரம் பேசினார். மீத்தேன் எரிவாயு எடுக்கும் திட்டத்திற்கு பல்வேறு கட்ட போராட்டங்களை நடத்தி வருவதாகவும் அப்போது வைகோ தெரிவித்தார்.

English summary

Declare Cauvery delta as protected farm zone: Medha