2 தமிழக அமைச்சர்களின் ஊழல் பட்டியல் தயாராக உள்ளது: வெற்றிவேல்
சென்னை: தமிழக அமைச்சர்கள் 2 பேரின் ஊழல் பட்டியல் தயாராக உள்ளது என தினகரன் ஆதரவு எம்.எல்.ஏ. வெற்றிவேல் தெரிவித்துள்ளார்.
ஆளுநரை தினகரன் ஆதரவு எம்.எல்.ஏக்கள் நேரில் சந்தித்து முதல்வர் எடப்பாடி பழனிச்சாமி ஆதரவை வாபஸ் பெறுவதாக கூறினர். இதையடுத்து கொறடா ராஜேந்திரன் பரிந்துரையில் 19 எம்.எல்.ஏக்களையும் தகுதி நீக்கம் செய்வது தொடர்பாக சபாநாயகர் தனபால் நோட்டீஸ் அனுப்பியிருந்தார்.
இந்த நோட்டீஸுக்கு சட்டசபை செயலாளரிடம் இன்று தினகரன் ஆதரவு எம்.எல்.ஏக்கள் வெற்றிவேல், தங்க தமிழ்ச்செல்வன் ஆகியோர் விளக்கம் தந்தனர். பின்னர் செய்தியாளர்களிடம் வெற்றிவேல் கூறியதாவது:
தமிழக அமைச்சர்கள் 2 பேரின் ஊழல் பட்டியல் எங்களிடம் உள்ளது. இந்த ஊழல் அமைச்சர்களை நீக்க வேண்டும்.
ஆளுநரை எம்.எல்.ஏக்கள் சந்தித்ததில் எந்த தவறும் இல்லை. நாங்கள் ஆட்சியை அழிக்க நினைக்கவில்லை.
இவ்வாறு வெற்றிவேல் கூறினார்.