தெர்மாகோல்.. தெர்மாகோல்.. செல்லூர் ராஜூவை ஓட்டிய திமுகவினர்! சட்டசபையில் சுவாரசியம்!
அமைச்சர் செல்லூர் ராஜூவை திமுக எம்எல்ஏக்கள் சட்டசபையில் தெர்மாகோல் தெர்மாகோல் என ஓட்டியதால் சிரிப்பலை ஏற்பட்டது.
சென்னை: தமிழக சட்டசபை கூட்டத் தொடர் இன்று தொடங்கி நடைபெற்று வருகிறது. இதில் அமைச்சர் செல்லூர் ராஜூவை திமுக எம்எல்ஏக்கள் தெர்மாகோல் தெர்மாகோல் என கிண்டலடித்ததால் அவையில் சிரிப்பலை ஏற்பட்டது.
நீர் ஆவியாவதைத் தடுக்க திட்டமிட்ட அமைச்சர் செல்லூர் ராஜூ கடந்த சில நாட்களுக்கு முன்பு வைகை ஆற்றில் தெர்மாகோலை போட்டு மூடினார். ஆனால் காற்றின் வேகத்தால் தெர்மாகோல் அட்டைகள் தண்ணீரில் போட்ட சில மணி நேரங்களிலே கரை ஒதுங்கியது.
இதனால் அமைச்சரின் திட்டம் புஸ்ஸானது. இதனை திமுக செயல்தலைவ்ர ஸ்டாலின், தமிழக பாஜக தலைவர் தமிழிசை சவுந்தரராஜன் உட்பட பலரும் விமர்சித்தனர். சமூக வலைதளங்களிலும் போதும் போதும் என நெட்டிசன்கள் வச்சு செய்து வந்தனர்.
பிரபலமான தெர்மாகோல் ராஜூ
அமைச்சர் செல்லூர் ராஜூ இந்த திட்டத்தின் மூலம் ஒரே நாளில் பட்டி தொட்டி எங்கும் பிரபலமானார். சீன பத்திரிக்கைகளும் அமைச்சரின் திட்டத்தை மெச்சி எழுதியிருந்தன.
தமிழக சட்டசபை கூட்டத்தொடர்
இந்நிலையில் தமிழக சட்டசபை இன்று துவங்கியுள்ளது. இதில் அனைத்துக்கட்சி எம்எல்ஏக்களும் பங்கேற்றுள்ளனர்.
கூட்டத்தொடரில் கேள்வி நேரம்
இந்நிலையில் சட்டசபை கூட்டத்தொடரில் கேள்வி நேரம் நடைபெற்றது. அப்போது விழுப்புரம் எம்.எல்.ஏ.,வின் கேள்விக்கு கூட்டுறவுத்துறை அமைச்சர் செல்லூர் ராஜூ பதிலளித்தார்.
தெர்மாகோல், தெர்மாகோல்'
அவர் பேசிக் கொண்டிருந்த போது அவையில் இருந்த திமுக உறுப்பினர்கள் ' தெர்மாகோல், தெர்மாகோல்' என, முழக்கமிட்டனர். திமுகவினரின் இந்த கோஷத்தால் அவையில் சிரிப்பலை ஏற்பட்டது.