மா.செ.க்களுக்கு செக் வைக்கும் கருணாநிதியின் 'உறுதிமொழிப் பத்திரம்' பார்முலா கை கொடுக்குமா?

சென்னை: தி.மு.க.வில் முதல் முறையாக மாவட்ட செயலாளர்களுக்கு செக் வைக்கும் வகையில் உட்கட்சி தேர்தலில் "உறுதிமொழிப் பத்திரம்" என்ற பார்முலா அறிமுகப்படுத்தப்பட்டுள்ளது. இதன் மூலம் மாவட்ட செயலாளர்களே சட்டசபை, லோக்சபா தேர்தலுக்கும் போட்டியிட்டு எம்.எல்.ஏ,. எம்.பிக்களாக, அமைச்சர்களாக "குத்தகை" எடுக்கும் முறைக்கு ஓரளவு முடிவு கட்டப்படலாம் எனக் கூறப்படுகிறது.

திமுகவில் உட்கட்சித் தேர்தல் மும்முரமாக நடைபெற்று வருகிறது. தேர்தல் நடைபெற்ற சில இடங்களில் உட்கட்சி மோதல் பகிரங்கமாக வெடித்து அடிதடியில் தொடங்கி அண்ணா அறிவாலயம் பஞ்சாயத்து வரைக்கும் வந்துள்ளது.

தற்போது 'செல்வாக்குமிக்க' "சர்ச்சைக்குரிய" மாவட்ட செயலாளர் பதவிக்கான தேர்தல் நடைபெறுகிறது. லோக்சபா தேர்தலில் திமுக படுதோல்வி அடைந்த போது ஊடகங்களில் முன்வைக்கப்பட்ட விமர்சனமே கால் நூற்றாண்டுகாலத்துக்கும் மேலாக "மாவட்ட செயலாளர்களாக" கோலோச்சிக் கொண்டிருக்கும் "குறுநில மன்னர்கள்தான்" என்று விமர்சிக்கப்பட்டது.

மா.செ.க்களுக்கு செக்

இதனைத் தொடர்ந்து திமுக மாவட்டங்கள் 34-ல் இருந்து 65 ஆகப் பிரிக்கப்பட்டது. இதனால் கட்சியில் இதுவரை மாவட்ட செயலாளர்கள்தான் எல்லாம் என்ற நிலைக்கு முற்றுப் புள்ளி வைக்கப்படும் என்ற நம்பிக்கை திமுக தொண்டர்களிடத்தில் எழுந்தது.

சோர்ந்த தொண்டர்கள்

அதே நேரத்தில் 31 புதிய மாவட்டங்களுக்கும் கூட தங்களது வாரிசுகளைத்தான் மாவட்ட செயலாளர்கள் கொண்டு வருவார்கள்.. இனி மாவட்ட செயலாளர்களும் அவர்களது குடும்பத்தினரும்தான் சட்டசபை, லோக்சபா தேர்தல்களில் போட்டியிட்டு எம்.எல்.ஏ., எம்.பிக்களாக அமைச்சர்களாக கோலோச்சுவார்களோ என்ற சோர்வும் திமுக தொண்டர்களிடம் ஏற்பட்டது.

அதிரடி நடவடிக்கை

இதைப்பற்றியெல்லாம் கண்டுகொள்ளாமல் மாவட்ட செயலாளர்கள் தங்களது வாரிசுகள், ஆதரவாளர்களை தயார் செய்து உட்கட்சித் தேர்தலில் களமிறக்க ஆயத்தமான நிலையில்தான் திமுக மேலிடம் அதிரடியாக ஒரு நடவடிக்கை எடுத்துள்ளது.

உறுதிமொழிப் பத்திரம்

அதாவது ஏற்கெனவே மாவட்ட செயலாளர்களாக பல ஆண்டுகாலம் இருந்தவர்கள் மீண்டும் மாவட்ட செயலாளர் பதவிக்கு போட்டியிட்டால் அவருக்கோ அவரது குடும்பத்தினருக்கோ சட்டசபை, லோக்சபா தேர்தலிலோ இதர கட்சி பதவிகளோ வாய்ப்பு கேட்க மாட்டோம் என்று கையெழுத்துப் போட்ட உறுதிமொழிப் பத்திரத்தைத் தர வேண்டும் என்று கண்டிஷன் போட்டுள்ளது திமுக தலைமை.

18 மா.செ.க்கள் ஏற்பு

இந்த கண்டிஷனையும் ஏற்று தற்போது 18 மாவட்ட செயலாளர்கள் கையெழுத்துப் போட்டு உறுதிமொழிப் பத்திரம் கொடுத்துள்ளனர். இந்த 18 பேர் யார் என்ற விவரம் வெளியிடப்படவில்லை. இதனால் இந்த பழைய 18 மாவட்ட செயலாளர்கள், முன்னாள் அமைச்சர்கள் தேர்தலில் போட்டியிட மாட்டார்கள் என்பதால் அந்த மாவட்டங்களில் புதியவர்கள் சட்டசபை, லோக்சபா தேர்தலுக்கு வேட்பாளராவதற்கு நிலைமை ஏற்பட்டுள்ளது. இதில் ஓரளவுக்கு வாரிசு அரசியல் முடிவுக்கு கொண்டுவரப்பட்டும் உள்ளது.

வேட்பாளர் தேர்வு?

ஆனாலும் மாவட்ட செயலாளர்கள் பரிந்துரைப்பவர்கள்தான் வேட்பாளராக முடியும் என்ற தற்போதைய திமுக கடைபிடிக்கும் அணுகுமுறைக்கும் முற்றுப் புள்ளி வைப்பதன் மூலமே மாவட்ட செயலாளர்களும் ஒரு நிர்வாகியே என்ற நிலை உருவாகும். புதியவர்கள், திறமையானவர்கள் தேர்தல்களில் போட்டியிட்டு அமைச்சர்களாகவும் ஆகவும் முடியும்.

தொடரும் அபாயம்

இல்லையெனில் திமுக தலைமை விரும்புகிற நிலைக்கு மாறாக மாவட்ட செயலாளர்களே மீண்டும் குறுநிலமன்னர்களாகத்தான் தொடருவார்கள் என்பது திமுக தொண்டர்களின் கருத்து.

தலைமைக்கு இடப்பெயர்ச்சி

தற்போது திருச்சி நேரு, திண்டுக்கல் பெரியசாமி, தூத்துக்குடி பெரியசாமி, நெல்லை கருப்பசாமி பாண்டியன், வேலூர் காந்தி, திருவண்ணாமலை எ.வ.வேலு என பல மாவட்ட செயலாளர்கள் இப்படி ஒரு உறுதிமொழிப் பத்திரம் தரவில்லை என்று கூறப்படுகிறது. இவர்களுக்கு கட்சியில் துணைப் பொதுச்செயலாளர், தலைமை நிலைய முதன்மை செயலாளர் என்ற ஏதேனும் ஒரு பதவி கொடுக்கப்பட்டு விடலாம் எனவும் கூறப்படுகிறது.

வாரிசுகள் கோலோச்சுவர்?

அதே நேரத்தில் இவர்கள் தலைமை நிலையத்திலும் இவர்களது வாரிசுகள் மற்றும் ஆதரவாளர்கள் மாவட்டங்களிலும் கோலோச்சும் வாய்ப்பும் இருக்கிறது என்று சுட்டிக் காட்டப்படுகிறது. இதற்கும் ஏதாவது ஒரு வகையில் கடிவாளம் போட்டால்தான் கீழ்மட்ட திமுக தொண்டர்கள் தங்களது உழைப்பால் அடுத்தடுத்த பொறுப்புகளுக்கு வர முடியும் என்ற நிலை உருவாகும் என்பதும் திமுகவினர் எதிர்பார்ப்பு.

English summary

DMK leader Karunanidhi said, the party leadership had taken written assurance from 18 senior leaders that they would not stake claim for any party post or seats in elections either for themselves or for their relatives.