விஜய்க்கு புரட்சி இளைஞர் பட்டம் தந்த திமுக!

அரசியல்ல இதெல்லாம் சாதாரணமப்பா என்ற கவுண்டரின் பொன்மொழி மீண்டும் மெய்யாகிறது, இந்த முறை திமுக - விஜய் விஷயத்தில். 5 ஆண்டுகளுக்கு முன் எதிர் முகாமிலிருந்து விஜய்யுடன், இனிய உறவு பூத்தது என உறவு கொண்டாட ஆரம்பித்துள்ளது திமுக.

விஜய்யின் பிறந்த நாளான இன்று அவருக்கு ட்விட்டரில் வாழ்த்துச் சொல்லியிருக்கிறார் திமுகவின் முக்கிய பிரமுகர், எம்எல்ஏ, மேற்கு சென்னை மாவட்ட திமுக செயலர் மற்றும் சினிமா தயாரிப்பாளர் ஜெ அன்பழகன்.

அதில், "அகில இந்திய அளவில் தமிழ் சினிமாவை முன்னுக்கு கொண்டு செல்லும் புரட்சி இளைஞர் விஜய்க்கு எனது பிறந்தநாள் வாழ்த்துகள். #RevolutionaryYouthVijay" என்று தெரிவித்துள்ளார்.

மீண்டும் ஆங்கிலத்தில், "A very Happy Birthday to #Ilayathalapathy #Vijay. Vijay is a simple man down to earth. An indispensable actor for Kollywood. #HBDDearVIJAY" என்று வாழ்த்தியுள்ளார்.

அகில இந்திய அளவில் தமிழ் சினிமாவை முன்னுக்கு கொண்டு செல்லும் புரட்சி இளைஞர் விஜய்க்கு எனது பிறந்தநாள் வாழ்த்துகள். #RevolutionaryYouthVijay

— J Anbazhagan (@JAnbazhagan) June 22, 2015

கடந்த தேர்தலில் திமுகவுக்கு எதிரான வெளிப்படையான நிலை எடுத்த விஜய், தன் தந்தையுடன் போய் ஜெயலலிதாவைச் சந்தித்து ஆதரவு தெரிவித்துவிட்டு வந்தார். தேர்தலில் விஜய் மக்கள் இயக்கம் சார்பில் எஸ் ஏ சந்திரசேகரன் அதிமுகவுக்காக தீவிர பிரச்சாரம் செய்தார்.

ஆனால் அதிமுக தலைமையுடன் உறவு சுமூகமாக இல்லாத நிலையில், தலைவா படத்துக்கு சிக்கல் வந்தபோது, விஜய்க்கு கை கொடுத்தவர் திமுகவின் ஜெ அன்பழகன்தான்.

இந் நிலையில் சில தினங்களுக்கு முன்பு நடந்த கருணாநிதியின் பேரன் நடிகர் அருள்நிதியின் திருமணத்தில் பட்டு வேட்டிச் சட்டை சகிதமாக வந்து கலந்து கொண்டார் விஜய்.

இந்த நிலையில் புரட்சி இளைஞர் பட்டம் தந்து வாழ்த்தியிருக்கிறார் அன்பகழகன்.

கூட்டிக் கழிச்சிப் பார்த்தா விடை புதுசா வரும் போலிருக்கே!

English summary

DMK's key leader J Anbazhagan, MLA has birthday wishes to actor Vijay with a title of 'Revolutionary Youth.'