திமுக செயல்தலைவர் மு.கஸ்டாலினுக்கு 65-ஆவது பிறந்த நாள்: கருணாநிதியிடம் ஆசி

திமுக செயல்தலைவர் மு.க.ஸ்டாலினின் 65-ஆவது பிறந்த நாள் இன்று கொண்டாடப்படுகிறது.

சென்னை: திமுக செயல்தலைவர் மு.க.ஸ்டாலினின் 65-ஆவது பிறந்த நாள் இன்று கொண்டாடப்படுகிறது. இதையொட்டி இன்று காலை கருணாநிதியை சந்தித்து ஸ்டாலின் ஆசி பெற்றார்.

மார்ச் 1-ஆம் தேதி திமுக செயல்தலைவர் ஸ்டாலின் பிறந்த நாளை திமுகவினர் விமரிசையாக கொண்டாடி வருகின்றனர். இந்த நாளை இளைஞர் எழுச்சி நாளாக கொண்டாடி வருகின்றனர்.

பிறந்த நாளையொட்டி இன்று காலை கோபாலபுரத்தில் உள்ள தந்தை கருணாநிதி மற்றும் தாய் தயாளு அம்மாளை சந்தித்த ஸ்டாலின் ஆசி பெற்றார். இதையடுத்து சென்னை மெரினாவில் உள்ள அண்ணா நினைவிடத்திலும் பெரியார் திடலில் உள்ள பெரியார் நினைவிடத்திலும் மரியாதை செலுத்தினார்.

பின்னர் அண்ணா அறிவாலயத்தில் தொண்டர்களின் வாழ்த்துகளை பெற்று வருகிறார். அவருக்கு பாஜக மாநில தலைவர் தமிழிசை சௌந்தரராஜன், புதுவை முதல்வர் நாராயணசாமி, காங்கிரஸ் கமிட்டியின் மாநில தலைவர் திருநாவுக்கரசர், காங்கிரஸ் மூத்த தலைவர் குமரி அனந்தன் உள்ளிட்டோர் வாழ்த்துகளை தெரிவித்தனர்.

ஸ்டாலினை தொலைபேசியில் தொடர்பு கொண்ட ரஜினிகாந்த் அவருக்கு பிறந்த நாள் வாழ்த்துகளை தெரிவித்தார். அப்போது கருணாநிதியின் உடல்நலம் குறித்தும் கேட்டறிந்தார்.

விடுதலை சிறுத்தைகள் கட்சித் தலைவர் திருமாவளவன், மதிமுக பொதுச் செயலாளர் வைகோ உள்ளிட்டோர் நேரில் சென்று ஸ்டாலினுக்கு வாழ்த்து தெரிவித்தனர். அதுபோல் மேற்கு வங்க மாநில முதல்வர் மம்தா பானர்ஜி டுவிட்டரில் வாழ்த்து தெரிவித்துள்ளார்.

English summary

DMK Working president MK Stalin's 65th birthday celebration. He gets blessings from his father and DMK Chief Karunanidhi.