மோடிக்கு 'ரொம்ப லேட்டாக' ராமதாஸ் வாழ்த்து! ராஜபக்சேவுக்கு அழைப்பு பற்றி பேசவில்லை!!

By Mathi

Updated: Thursday, May 22, 2014, 13:21 [IST]

Subscribe to Oneindia Tamil

சென்னை: நாட்டின் பிரதமராக பதவியேற்க உள்ள நரேந்திர மோடிக்கு பாட்டாளி மக்கள் கட்சியின் நிறுவனர் டாக்டர் ராமதாஸ் இன்று தொலைபேசியில் வாழ்த்து தெரிவித்தார். அப்போது இலங்கை அதிபர் ராஜபக்சேவை அழைத்தது பற்றி ராமதாஸ் எதுவும் பேசவில்லை எனத் தெரிகிறது.

பாட்டாளி மக்கள் கட்சியின் தலைமை நிலையம் இன்று வெளியிட்டுள்ள செய்தி அறிக்கை:

இந்தியாவின் புதிய பிரதமராக தேர்ந்தெடுக்கப்பட்டுள்ள நரேந்திர மோடியை பாட்டாளி மக்கள் கட்சியின் நிறுவனர் ராமதாஸ் இன்று காலை 9 மணிக்கு தொலைபேசி மூலம் தொடர்பு கொண்டு வாழ்த்து தெரிவித்தார்.

தொலைபேசி உரையாடலின் தொடக்கத்தில் ராமதாஸுக்கு நரேந்திர மோடி தமிழில் வணக்கம் தெரிவித்தார். தொடர்ந்து மோடியிடம் பேசிய டாக்டர் ராமதாஸ், "இந்தியாவின் புதிய பிரதமராக பதவியேற்கவிருக்கும் உங்களுக்கு எனது இதயம் கனிந்த வாழ்த்துக்களைத் தெரிவித்துக் கொள்கிறேன். ‘இந்தியாவிலுள்ள ஒவ்வொருவரின் முன்னேற்றத்திற்காக உங்கள் ஒவ்வொருவருடனும் எப்போதும் இருப்பேன் என்ற உங்களின் மந்திரம் எனக்கு மிகவும் பிடிக்கும். ஒட்டுமொத்த நாட்டு மக்களும் உங்களுடன் இருக்கிறார்கள்.

உங்கள் தலைமையில் வளமான, வலிமையான நாடாக இந்தியா உருவெடுக்கும் என்று நம்புகிறேன். இந்தியாவின் பிரதமர் என்ற முறையில் அனைத்து முயற்சிகளிலும் நீங்கள் வெற்றி பெற எனது வாழ்த்துக்களைத் தெரிவித்துக் கொள்கிறேன் என்று கூறினார்.

வாழ்த்துக்களுக்காக டாக்டர் ராமதாஸூக்கு நரேந்திர மோடி நன்றி தெரிவித்துக் கொண்டார்.

இவ்வாறு அதில் தெரிவிக்கப்பட்டுள்ளது.

ஆனால் பதவியேற்பு விழாவுக்கு ராஜபக்சேவை மோடி அழைத்தது பற்றி இந்த தொலைபேசி உரையாடலில் ராமதாஸ் எதுவும் தெரிவித்ததாக பாமகவின் அதிகாரப்பூர்வ செய்தி அறிக்கையில் எதுவும் தெரிவிக்கப்படவில்லை.

ரொம்ப தாமதம்..

மே 16-ந் தேதியன்று லோக்சபா தேர்தல் முடிவுகள் வெளியாகிவிட்டன. அன்று காலையிலேயே பாரதிய ஜனதாவின் தனிப்பெரும்பான்மை வெற்றி உறுதி செய்யப்பட்டுவிட்டது. அதேபோல் தருமபுரியில் பாமகவின் அன்புமணியும் வென்றுவிட்டார்.

ஆனாலும் பிரதமர் மோடிக்கு தொலைபேசியில் தொடர்பு கொண்டு டாக்டர் ராமதாஸ் வாழ்த்து தெரிவிக்காமலேயே இருந்தார். எதிர்க்கட்சியான திமுக கூட்டணி தினமும் ஒரு வாழ்த்தை மோடிக்கு தெரிவித்துக் கொண்டிருக்கிறது. ஆனால் பாமக நிறுவனர் அமைதி காத்து வந்தார்.

இதற்கு காரணம், அன்புமணிக்கு மத்திய அமைச்சர் பதவி கிடைக்காது என்ற தகவலைத் தவிர வேறொன்றுமில்லை. தேர்தலில் ராமதாஸ் பெரிதாக ஒன்றும் பிரசாரமும் செய்யவில்லை. பாமகவினரும் கூட்டணிக்காக தேர்தல் வேலைகள் செய்யவும் இல்லை என்பது பாஜகவுக்கும் தெரியும்.

அதனால் கொஞ்சம் விட்டுப் பிடிப்பது என்ற கொள்கையோ அன்புமணிக்கான அமைச்சர் பதவி விவகாரத்தில் பிடிகொடுக்காமல் பதில் சொல்லி வருகிறது பாஜக. இந்த நிலையில்தான் ஒரு வாரம் கழித்து மோடிக்கு ராமதாஸ் போன் போட்டு வாழ்த்து தெரிவித்திருக்கிறார் என்பது குறிப்பிடத்தக்கது.