ரஜினி எங்கள் இயக்கத்துக்கு ஆதரவளிக்க வேண்டும்!! - ஜிகே வாசன்
சூப்பர் ஸ்டார் ரஜினிகாந்த் எங்கள் இயக்கத்துக்கு ஆதரவளிக்க வேண்டும் என்று புதிய கட்சி தொடங்கவிருக்கும் ஜிகே வாசன் வேண்டுகோள் விடுத்துள்ளார்.
காங்கிரஸ் கட்சியிலிருந்து பிரிந்து தனிக்கட்சி தொடங்கவிருக்கிறார் ஜிகே வாசன். புதுக் கட்சி, அதற்கான கொடி போன்றவற்றை விரைவில் அறிவிக்கப் போவதாகக் கூறிவருகிறார்.
இதுவரை தமிழகத்தில் காங்கிரஸ் கட்சி இருக்கிறதா என்று கேட்டுக் கொண்டிருந்தார்கள். இளங்கோவன் நியமனம், வாசன் பிளவு போன்றவற்றால் மீடியாவின் கவனம் முழுவதும் இப்போது காங்கிரஸ் பக்கம் திரும்பியுள்ளது.
இந்த நிலையில் இன்னும் புதிய கட்சியையே அறிவிக்காத ஜி கே வாசன், தான் ஆரம்பிக்கவிருக்கும் கட்சிக்கு ரஜினியின் ஆதரவை வேண்டியுள்ளார்.
தனியார் தொலைக்காட்சி ஒன்றுக்கு பேட்டி அளித்த ஜி.கே.வாசன் கூறியபோது, "சூப்பர் ஸ்டார் ரஜினி எங்கள் இயக்கத்திற்கு ஆதரவு கொடுக்க வேண்டும் என்று நான் மட்டுமின்றி எனது தொண்டர்களும் விரும்புகின்றனர்.
ரஜினி ஆதரவு கொடுக்கும் அந்த நல்ல நேரத்தை எதிர்பார்க்கிறேன். தமாகா தொடங்குவதற்கும் அதன் வெற்றிக்கும் உறுதுணையாக இருந்த ரஜினி, இப்போது எங்கள் இயக்கத்தையும் ஆதரிப்பார் என்ற நம்பிக்கை உள்ளது," என்றார்.
1996-ல் வாசனின் தந்தை ஜிகே மூப்பனார் தமாகா ஆரம்பித்த பிறகு நடத்திய செய்தியாளர் சந்திப்பில், தமாகா தலைவர் யார் என்று கேட்டபோது, "சூப்பர் ஸ்டார் ரஜினிகாந்த்னு" போட்டுக்கங்க என்றார். அந்த அளவு தமாகா பின்னணியில் இருந்தவர் ரஜினி.
இப்போது மூப்பனாரும் இல்லை. அன்றிருந்த அரசியல் சூழலும் இல்லை. எனவே ரஜினி ஆதரவு இவர்களுக்குக் கிடைக்குமா என்பதும் தெரியவில்லை!