கருணாநிதி பெயர் இடம் பெற்றதால் நிறுத்தி வைக்கப்பட்ட 2 லட்சம் + 1 பொருளியல் பாடப் புத்தகம்

Updated: Thursday, June 18, 2015, 17:19 [IST]

Subscribe to Oneindia Tamil

சென்னை: தமிழக அரசின் பிளஸ் 1 மற்றும் பிளஸ் டூ பொருளியல் பாட நூல்களின் முகவரையில், முன்னாள் முதல்வர் கருணாநிதி, பள்ளிக் கல்வித்துறை அமைச்சர் தங்கம் தென்னரசு ஆகியோரின் பெயர்கள் இடம் பெற்றதால் அந்தப் புத்தகங்கள் விநியோகிக்கப்படாமல் நிறுத்தி வைக்கப்பட்டுள்ளன.

அரசின் இந்த செயலால் மாணவர்களுக்கு புத்தகம் கிடைக்காத சூழ்நிலை எழுந்துள்ளது. இதற்கு பாமக நிறுவனர் டாக்டர் ராமதாஸ் கண்டனம் தெரிவித்துள்ளார்.

கடந்த திமுக ஆட்சிக்காலத்தில் சமச்சீர் கல்வித் திட்டம் அறிமுகமானது. தற்போது தமிழகம் முழுவதும் சமச்சீர் கல்வித் திட்டமே அமலில் உள்ளது.

1ம் வகுப்பு முதல் 9ம் வகுப்பு வரை சமச்சீர் கல்வித் திட்டம் உள்ளது. இருப்பினும் 10, 11 மற்றும் 12 ஆகிய வகுப்புகளுக்கு பழைய பாடத் திட்டமே நடைமுறையில் உள்ளது.

தற்போது பிளஸ் 1 மற்றும் பிளஸ் 2 ஆகிய இரு வகுப்புகளின் பொருளியில் பாடத்துக்கான முகவரை பிரச்சினையைக் கிளப்பியுள்ளது. அதாவது அதில் முதல்வர் கருணாநிதி, பள்ளிக் கல்வித்துறை அமைச்சர் தங்கம் தென்னரசு ஆகியோருக்கு நன்றி என்று அப்போதைய பாடத் திட்டக் குழுத் தலைவர் நாகநாதன் எழுதி வைத்து விட்டுப் போய் விட்டார். இது தொடர்ந்து இடம் பெற்று வருகிறது.

இது தற்போது அரசின் கவனத்திற்குப் போயுள்ளது. இதையடுத்து புத்தகங்களை விநியோகிக்காமல் நிறுத்தி வைக்க உத்தரவிடப்பட்டுள்ளது. அதன் படி புத்தகங்கள் விநியோகிக்கப்படவில்லை. முகவரியை மாற்றி விட்டு அல்லது நீக்க விட்டு புத்தகங்களை விநியோகிப்பது குறித்து அதிகாரிகள் ஆலோசனை நடத்தி வருகின்றனராம்.

மொத்தம் 2 லட்சத்திற்கும் மேற்பட்ட புத்தகங்கள் அச்சிடப்பட்டுள்ளதாக கூறப்படுகிறது. அத்தனையும் தற்போது அரசின் முடிவுக்காக காத்துள்ளது. மாணவர்களும் புத்தகத்தின் வருகைக்காக காத்துள்ளனர்.

கலைஞர் பெயர் இருப்பதால் 11 ஆம் வகுப்பு புத்தகங்கள் முடக்கம்: புதிதாக அச்சிடப்படும் வரை அரசு எந்திரம் உறங்கிக் கொண்டிருந்ததா?
— Dr S RAMADOSS (@drramadoss) June 18, 2015

இது நாள் வரை தூங்கிக் கொண்டிருந்ததா?

இந்த நிலையில் இந்த குழப்பம் குறித்து பாமக நிறுவனர் டாக்டர் ராமதாஸ் டிவிட்டரில் கருத்து தெரிவித்துள்ளார்.

அதில், கலைஞர் பெயர் இருப்பதால் 11ம் வகுப்பு புத்தகங்கள் முடக்கம்: புதிதாக அச்சிடப்படும் வரை அரசு இயந்திரம் உறங்கிக் கொண்டிருந்ததா? என்று கேட்டுள்ளார் அவர்.