ஜாக்கி சானுக்கு வாழ்நாள் சாதனையாளர் ஆஸ்கர் விருது!

சென்னை: வாழ்நாள் சாதனையாளருக்கான ஆஸ்கர் விருது நடிகர் ஜாக்கி சானுக்கு அறிவிக்கப்பட்டுள்ளது.

ஜாக்கி சான் என்றாலே உலக அளவில் சண்டைப் பட பிரியர்களுக்கு உற்சாகம்தான். ஹாங்காங்கில் பிறந்த 62 வயதாகும் ஜாக்கிச் சான் அதிரடிப் படங்களில் நடித்து அசாத்தியமான சண்டைக் காட்சிகளின் மூலம் தனது திறமையை வெளிப்படுத்தியவர். அதன் மூலம் ஹாலிவுட் திரைப்படங்களில் காலடி வைத்து ரஷ் ஹவர், கராத்தே கிட் போன்ற திரைப்படங்களில் நடித்து புகழ்பெற்றவர்.

ஹாலிவுட் திரையுலகில் பொன்விழா காணும் ஜாக்கி சான், நடிகர், தற்காப்புக் கலை நிபுணராக மட்டுமின்றி, தயாரிப்பாளர், இயக்குநர், பாடகர் என்றும் முத்திரை பதித்தவர்.

ஜாக்கி சான் ரசிகர்கள்

தற்காப்பு கலையை சினிமாவில் பயன்படுத்தி அதன் மூலம் மக்களை கவர்ந்த ஜாக்கிசான் தனது 8 வயது முதல் நடிக்கத்தொடங்கியவர். எழுத்தாளராகவும், இயக்குநராகவும் முப்பதுக்கும் மேற்பட்ட திரைப்படங்களை ஹாங்காங்கில் எடுத்துள்ளார். இந்தியாவிலும் குறிப்பாக தமிழகத்திலும் இவருக்கு ஏராளமான ரசிகர்கள் உள்ளனர்.

ஆஸ்கர் விருது

உலகிலேயே அதிகம் சம்பளம் பெறும் இரண்டாவது நடிகர் என்று ஃபோர்ப்ஸ் பத்திரிகை இவரை பட்டியலிட்டிருந்தது. இதுவரை ஆஸ்கர் விருது பெறாத ஜாக்கி சானுக்கு முதல் முறையாக கவுரவ ஆஸ்கர் விருது அறிவிக்கப்பட்டுள்ளது. இதற்கான அறிவிப்பை "THE ACADEMY OF MOTION PICTURE ARTS AND SCIENCE" அமைப்பு அறிவித்துள்ளது.

நவம்பர் 12ல் விருது

ஜாக்கிசானின் சினிமா பயணத்தை கௌரவிக்கும் வகையில் இந்த விருது அறிவிக்கப்பட்டுள்ளது. ஜாக்கி சான் உடன் மேலும் மூவருக்கு இந்த விருது அறிவிக்கப்பட்டுள்ளது.

லாஸ்ஏஞ்சல்ஸ்

எடிட்டர் அன்னி கோட்ஸ், காஸ்டிங் டைரக்டர் லின் ஸ்டால்மாஸ்டர் மற்றும் ஆவண திரைப்பட தயாரிப்பாளர் ரெட்ரிக் வைஸ்மேன் மூவரும் கவுரவ ஆஸ்கர் விருதை பெறுகின்றனர். இவர்களுக்கு நவம்பர் 12 தேதி நடக்கும் லாஸ் ஏஞ்சல்ஸ்சில் நடைபெறும் விழாவில் விருதுகள் வழங்கப்படும்.

English summary

Martial arts expert and actor Jackie Chan is to receive a lifetime achievement Oscar