ஓசூரைக் கைப்பற்றிய முதல் அதிமுக எம்.எல்.ஏவுக்கு அமைச்சர் பதவியை பரிசளித்த ஜெ.!
சென்னை: தமிழக அமைச்சரவையில் புதிதாக இணைக்கப்பட்டுள்ள பாலகிருஷ்ண ரெட்டி ஓசூர் தொகுதியிலிருந்து தமிழக சட்டசபைக்குத் தேர்ந்தெடுக்கப்பட்டவர் ஆவார்.
ஓசூர் தொகுதி தனிச் சிறப்பு வாய்ந்ததாகும். கர்நாடக எல்லையில் உள்ள இந்த தொழில் நகரமானது, இதுவரை ஒருமுறை கூட திமுக, அதிமுக வேட்பாளர்களை சட்டசபைக்கு அனுப்பியதில்லை. மாறாக இது காங்கிரஸ் கோட்டையாக திகழ்ந்து வந்தது.
இதன் காரணமாக, திமுக அதிமுக கட்சிகளும், இந்தத் தொகுதியை கூட்டணிக் கட்சிகளுக்கு ஒதுக்கி விடுவது வழக்கம். இந்த முறை அதிமுக இங்கு பாலகிருஷ்ண ரெட்டியை வேட்பாளராக நிறுத்தியது. தெலுங்கர்கள் அதிகம் வசிக்கும் இத்தொகுதியில் பெரும்பாலும் தெலுங்கு மொழி பேசுவோர்தான் வெல்வது வழக்கம்.
இந்த தேர்தலில் காங்கிரஸின் செல்வாக்கைத் தகர்த்து அதிமுகவின் பாலகிருஷ்ண ரெட்டி வெற்றி பெற்று புதிய வரலாறு படைத்தார். ஓசூர் தொகுதி உருவானது முதலே அங்கு வெற்றி பெறாத திராவிடக் கட்சிகளுக்கு அதிமுக மூலமாக இந்தத் தேர்தலில் முதல் வெற்றி கிட்டியது.
ஓசூர் தொகுதியில் கடந்த 3 முறை எம்.எல்.ஏவாக இருந்தவர் காங்கிரஸ் கட்சியின் கோபிநாத். அசைக்க முடியாத நபராக இருந்து வந்த அவரை ஆட்டிப் பார்த்தவர் பாலகிருஷ்ண ரெட்டி. இந்தத் தேர்தலில் பாலகிருஷ்ண ரெட்டி 89,510 வாக்குகளைப் பெற்றார். கோபிநாத் பெற்ற வாக்குகள் 65,034. 24,476 வாக்கு வித்தியாசத்தில் கோபிநாத்தை வீழ்த்தி வெற்றி பெற்றார் பாலகிருஷ்ண ரெட்டி.
பாலகிருஷ்ண ரெட்டி பிளஸ்டூ வரை படித்துள்ளார். 47 வயதான இவர் மீது ஒரு கிரிமினல் வழக்கு நிலுவையில் உள்ளது. இவரிடம் ரூ. 26.25 கோடி மதிப்பிலான சொத்துக்கள் உள்ளதாக வேட்பு மனுவுடன் இவர் தாக்கல் செய்த சொத்துக் கணக்கு விவரம் தெரிவிக்கிறது.
இந்த நிலையில்தான் பாலகிருஷ்ண ரெட்டிக்கு அமைச்சர் பதவி கிடைத்துள்ளது. ஆனால் முதலில் அறிவிக்கப்பட்ட அமைச்சர்கள் வரிசையில் அவரைச் சேர்க்காமல் அமைச்சர்கள் பதவியேற்ற அடுத்த சில மணி நேரங்களிலேயே அமைச்சரவையில் மாற்றம் செய்ய ஜெயலலிதா முடிவு செய்தது ஏன் என்றுதான் தெரியவில்லை.
ஏதாவது ராசி, சென்டிமென்ட் இருக்குமோ என்னவோ!
Click it and Unblock the Notifications
Sign in with Google