ஆட்சி மாற்றம் காண வருகிறது 2016... புத்தாண்டு வாழ்த்து செய்தியில் கருணாநிதி நம்பிக்கை
சென்னை: 'ஆட்சி மாற்றம் காண வருகிறது 2016ஆம் ஆண்டு' என்று திமுக தலைவர் கருணாநிதி தமது புத்தாண்டு வாழ்த்து செய்தியில் நம்பிக்கை தெரிவித்துள்ளார்.
கருணாநிதி வெளியிட்ட புத்தாண்டு வாழ்த்து செய்தி:
தமிழக மக்களுக்குத் தொடர்ச்சியாக வேதனைகளைத் தந்த 2015ஆம் ஆண்டு மறைந்து புதுவாழ்வு தந்திடப் பொங்கி வருகிறது 2016 ஆங்கிலப் புத்தாண்டு!
தி.மு.க. ஆட்சியில் தொழில் வளர்ச்சியில் தமிழகம் 2011 வரை முன்னணி மாநிலம்! அ.தி.மு.க. ஆட்சியில் தற்போது இந்தியாவிலேயே கடைசி மாநிலம்!
குறையாத விலைவாசி
அ.தி.மு.க. அரசின் பால்விலை உயர்வால்-மின்கட்டண உயர்வால்-பேருந்துக் கட்டண உயர்வால் அனைத்துத் தரப்பினரும் பாதிக்கப்பட்டுள்ளனர். ஜெயலலிதா, ஐந்தாண்டுகள் ஆகியும் விலைவாசியைக் குறைக்கவில்லை, தி.மு.க. ஆட்சி உருவாக்கிய மின் திட்டங்கள் தந்த மின்சாரம் அல்லாமல், ஒரு மெகாவாட் மின்சாரத்தைக்கூட உற்பத்தி செய்திடவில்லை.
கெட்டுப் போன சட்டம் ஒழுங்கு
சென்னை உயர்நீதிமன்றப் பாதுகாப்பிற்குத் தமிழகக் காவல்படை வேண்டாம், மத்திய காவல்படையே தேவை என்ற உயர்நீதி மன்றத்தின் முடிவும், காவல் துறை மீது நம்பிக்கை இல்லை என்ற அறிவிப்பும் தமிழகத்தில் சட்டம்-ஒழுங்கு கெட்டுக் கிடப்பதைப் படம் பிடித்துக் காட்டுகிறது.
அடுக்கடுக்காக அவலங்கள்
சென்னைத் துறைமுகம்-மதுரவாயல் மேம்பாலச் சாலைத்திட்டம் அ.தி.மு.க. அரசால் முடக்கப்பட்டு, துறைமுக வர்த்தகம் பாதிக்கப்பட்டுள்ளது. அண்மையில் ஏற்பட்ட மழை வெள்ளத்தின்போது ஜெயலலிதா ஆட்சி, உரிய நேரத்தில் செம்பரம்பாக்கம் ஏரியைத் திறந்துவிட நடவடிக்கை எடுக்காமல் தாமதித்ததால், சென்னைவாழ் மக்களுக்கு ஏற்பட்ட கொடுமைகள் சொல்லில் அடங்காதவை. இப்படி அ.தி.மு.க. ஆட்சி அனைத்து முனைகளிலும் தந்த அவலங்களை அடுக்கிக்கொண்டே போகலாம்!
ஆட்சி மாற்றம் காண வரும் 2016
இந்நிலையில், தி.மு.க. அரசு அன்று உருவாக்கி 2015இல் பயன் தந்த மெட்ரோ இரயில் திட்டம், மின்சாரப் பிரச்சினையைத் தீர்த்த வடசென்னை, மேட்டூர், வல்லுhர் மின் திட்டங்கள் போன்ற பல்வேறு புதிய திட்டங்கள் மீண்டும் உருவாக-தொழில் வளம் சிறக்க-அண்டை மாநிலங்களுடன் நல்லுறவு பேணி நீர்வளம் பெருக்க-விவசாயம் செழிக்க- தமிழகம் வளமும் நலமும் பெற-அனைத்திற்கும் வாயிலாக ஆட்சி மாற்றம் காண வருகிறது ஆண்டு 2016 என்பதை நினைவுபடுத்தி, தமிழக மக்களுக்கு எனது உளமார்ந்த ஆங்கிலப் புத்தாண்டு தின நல்வாழ்த்துகளை உரித்தாக்குகிறேன்.
இவ்வாறு கருணாநிதி புத்தாண்டு வாழ்த்து செய்தியில் தெரிவித்துள்ளார்.
Click it and Unblock the Notifications
Sign in with Google