ஆர்கே நகரில் டிடிவி தினகரனுக்கு ஆண்கள் கூட ஆரத்தி எடுக்கும் அலப்பறை!
ஆர்கே நகரில் போட்டியிடும் அதிமுக அம்மா அணி வேட்பாளர் டிடிவி தினகரனுக்கு ஆரத்தி எடுக்க ஆண்களும் பள்ளி சிறுமிகளும் ஆர்வம் காட்டுகின்றனர்.
சென்னை: ஆர்கே நகரில் அதிமுக அம்மா வேட்பாளர் தினகரனுக்கு ஆரத்தி எடுக்க ஆண்களும் சிறுமிகளும் கூட போட்டி போடுகின்றனர். ஆரத்தி எடுப்பவர்களுக்கு 300 ரூபாயிலிருந்து 500 ரூபாய் வரை பணம் கிடைக்கிறது.
ஆர்கே நகரில் நடக்கவுள்ள இடைதேர்தலையொட்டி அப்பகுதியே பிரமாண்ட திருவிழாக் கோலம் பூண்டுள்ளது. டிடிவி தினகரன் செல்லுமிடங்களில் அவருடன் செல்லும் ஆட்களின் எண்ணிக்கை குறைவாக உள்ளது. ஆனால், அவர் வரும் இடங்களில் எல்லாம் ஆண்களும் பள்ளிக்குச் செல்லும் சிறுமிகளும் ஆரத்தி எடுப்பதில் ஆர்வம் காட்டுகின்றனர்.
உடலில் தொற்று ஏற்படுகிறது என்பதால் பெரும்பாலான இடங்களில் வண்டியிலேயே நின்று பிரச்சாரம் செய்கிறார். இருந்தாலும் மக்கள் அவர் இருக்கும் இடத்துக்கு நேரே சென்று ஆரத்தி எடுக்கின்றனர். இதில் ஆண்கள் கூட எந்தக் கூச்சமும் இல்லாமல் ஆரத்தி எடுக்கின்றனர். பள்ளி செல்லும் சிறுமிகள் ஆரத்தி எடுக்கும்போது மிகவும் சிரமப்பட்டு தலையை குனிந்து நெற்றியில் பொட்டு வைத்துக்கொள்கிறார். இதற்காக, அவர் பிரச்சாரத்துக்கு செல்லுமிடங்களில் பலர் ஆரத்தி தட்டுடன் இருக்கின்றனர்.
இந்த ஆரத்தி ஆர்வத்துக்குக் காரணம் ஒரு ஆரத்திக்கு 300 ரூபாயிலிருந்து 500 ரூபாய் வரை கொடுக்கப்படுகிறது என்பதால் போட்டி போட்டுக்கொண்டு ஆரத்தி எடுக்கின்றனர். தமிழ் கலாச்சார வழக்கப்படி, ஆரத்தி என்பது பெண்கள் மட்டுமே செய்யும் சடங்கு. பணத்துக்கு முன்னால் கலாச்சாரமாவது...கருப்பட்டியாவது!