மேட்டூர் அணை நீர் மட்டம் கிடுகிடு உயர்வு- 109அடியை தாண்டியது! 1.40 லட்சம் கன அடி நீர்வரத்து!
மேட்டூர்: தமிழ்நாட்டில் காவிரியின் குறுக்கே கட்டப்பட்டுள்ள மேட்டூர் அணையின் நீர் மட்டம் கிடுகிடுவென உயர்ந்து வருகிறது. மேட்டூர் அணையின் நீர்மட்டம் நேற்று இரவு 103.13 அடியாக இருந்தது. இன்று காலை மேட்டூர் அணையின் நீர்மட்டம் 107 அடியை தாண்டியது. தற்போது சில மணிநேரங்களிலேயே 2 அடி உயர்ந்து 109 அடியை எட்டியிருக்கிறது. மேட்டூர் அணைக்கான காவிரி நீர் வரத்து 1.40 லட்சம் கன அடியாக உள்ளது. மேட்டூர் அணையின் நீர் இருப்பு 77 டிஎம்சியாகும்.
கர்நாடகாவில் இருந்து திறந்துவிடப்படும் காவிரி நீர் தமிழ்நாடு எல்லையான பிலிகுண்டுலுவை கடந்த ஒகேனக்கல் வழியாக மேட்டூர் அணையை வந்தடையும். கர்நாடகாவில் தென்மேற்கு பருவமழை கொட்டித் தீர்த்ததால் காவிரியின் கிருஷ்ணராஜ சாகர் அணை நிரம்பியது. காவிரியின் துணை நதியான கபிலா ஆற்றின் குறுக்கே கட்டப்பட்ட கபினியும் நிரம்பியது.
கிருஷ்ணராஜ சாகர் அணையில் இருந்து வினாடிக்கு 1,31,234 கன அடிநீர் காவிரியில் திறந்துவிடப்படுகிறது. கபினி அணையில் இருந்து வினாடிக்கு 35,000 கன அடிநீர் திறந்துவிடப்படுகிறது. மொத்தமாக காவிரியில் 1,66,234 கன அடி நீரை கர்நாடகா திறந்துவிட்டுள்ளது.
தமிழ்நாட்டின் எல்லையான ஒகேனக்கல்லுக்கு இன்று காலை காவிரி நீர் வரத்து வினாடிக்கு 1,55,000 கன அடியாக உள்ளது. இதனால் ஒகேனக்கல்லில் 100 அடி உயர பாறைகள் அனைத்தும் காவிரி வெள்ளத்தில் மூழ்கிவிட்டன. ஒகேனக்கல்லில் அருவிகளில் குளிக்கவும் பரிசல்கள் இயக்கவும் இன்று 13-வது நாளாக தடை தொடருகிறது.
ஒகேனக்கல் வழியாக மேட்டூர் அணைக்கு வினாடிக்கு 1.34 லட்சம் கன அடி நீர்வரத்து உள்ளது. இதனால் நேற்று இரவு 103.13 அடியாக இருந்த மேட்டூர் அணையின் நீர் மட்டம் இன்று காலை 107 அடியை தாண்டியது. அடுத்த சில மணிநேரங்களிலேயே மேலும் 2 அடி உயர்ந்து தற்போது 109 அடியை தாண்டியிருப்பது பெருமகிழ்ச்சியை ஏற்படுத்தியுள்ளது. மேட்டூர் அணையின் மொத்த கொள்ளளவு 120 அடியாகும். தற்போதைய நீர் இருப்பு 77 டிஎம்சி. தற்போதைய நீர்வரத்து தொடர்ந்தால் அடுத்த சில நாட்களில் மேட்டூர் அணையும் நிரம்பிவிடும். மேட்டூர் அணையில் இருந்து வினாடிக்கு 1,000 கன அடிநீர் குடிநீருக்காக திறக்கப்படுகிறது. மேட்டூர் அணை நிரம்பி வருவதால் காவிரி டெல்டா பாசனத்துக்காக நீர் திறந்துவிடப்பட இருக்கிறது.
Click it and Unblock the Notifications
Sign in with Google