நாங்கள் அடிமைதான்.. சட்டசபையில் ஸ்டாலினுக்கு அமைச்சர் தங்கமணி கொடுத்த பதில பாருங்க!

By Veera Kumar

Updated: Friday, August 5, 2016, 11:27 [IST]

Subscribe to Oneindia Tamil

சென்னை: எதிர்க்கட்சி தலைவர் மு.க.ஸ்டாலின், அதிமுகவினரை அடிமைகள் என கூறியதற்கு பதிலடியாக, ஆம், நாங்கள் அடிமைகள்தான் என்று தெரிவித்துள்ளார் மின்துறை அமைச்சர் தங்கமணி.

சட்டசபையில் நேற்று முன்தினம், அதிமுக எம்எல்ஏ முத்தையா, திமுக எம்எல்ஏக்களை பார்த்து மறைமுகமாக 89 வயக்காட்டு பொம்மைகள் என்று கூறியுள்ளார்.

இதை கண்டித்து ஸ்டாலின் பதிலுக்கு அதிமுகவினரை பார்த்து ஒரு வார்த்தையை சொல்ல, அதை அவைக் குறிப்பில் இருந்து சபாநாயகர் நீக்கிவிட்டார்.

ஸ்டாலின் குற்றச்சாட்டு

இதன்பிறகு நிருபர்களிடம் பேசிய ஸ்டாலின், அதிமுகவினரின் பெயரை குறிப்பிடாமல், 131 கொத்தடிமைகள், சோற்றால் அடித்த பிண்டங்கள் என்று தான், கூறியதாகவும், அதை சபாநாயகர் அவை குறிப்பில் இருந்து நீக்கிவிட்டதாகவும் கூறினார்.

தரம் தாழ்ந்த விமர்சனம்

இப்படி ஆளும் கட்சியும் எதிர்க்கட்சியும், ஒருவரை ஒருவர் தரம் தாழ்ந்து விமர்சனம் செய்வதை பாமக நிறுவனர் ராமதாஸ் கண்டித்து நேற்று அறிக்கை வெளியிட்டிருந்தார். பொதுமக்கள் மத்தியிலும், இந்த தகராறு அதிர்ச்சியை ஏற்படுத்தியது.

அடிமைகள்தான்

இந்நிலையில், மது விலக்கு மற்றும் ஆயத்தீர்வை துறை அமைச்சர் தங்கமணி நேற்று சட்டசபையில், பேசுகையில், எதிர்க்கட்சி தலைவர் ஸ்டாலின், எங்களை அடிமைகள் என்றார். ஏற்றுக் கொள்கிறோம்.

அன்புக்கு அடிமை

முதல்வர் ஜெயலலிதா ஒரு தெய்வம், அந்த தெய்வத்திற்கு அடிமையாக இருக்கிறோம். அவரது அன்பிற்கு அடிமை, அவரது பாசத்திற்கு அடிமை, 'அம்மா' என்ற சொல்லுக்கு அடிமை. அவரது ஆணையை ஏற்று செய்து முடிக்க, ஒன்றரை கோடி தொண்டர்களும் தயாராக உள்ளோம். இவ்வாறு அமைச்சர் தெரிவித்தார்.

இப்படி சொல்லலாம்

சரி.. அப்போ வயக்காட்டு பொம்மைகள் வார்த்தைக்கு திமுக எந்த மாதிரி விளக்கம் கொடுக்கும். ஒருவேளை, வயலுக்கு சேதம் விளைவிக்கும் பறவைகளை விரட்டி, அரிய சேவை செய்வது வயக்காட்டு பொம்மைதான் என்று விளக்கம் தருவார்களோ?

களைகட்டுகிறது

கடந்த அதிமுக ஆட்சியின்போது, திமுக பிரதான எதிர்க்கட்சி அந்தஸ்தை பெற முடியவில்லை. அப்போது திமுக உறுப்பினர்களுக்கு அதிகம் பேச வாய்ப்பு கிடைக்கவில்லை. இப்போது வாய்ப்பு அதிகம் கிடைத்துவரும் நிலையில், அவை நடவடிக்கைகள் களை கட்டியுள்ளன.