மே 8ல் கூத்தாண்டவர் கோயில் திருவிழா… மிஸ் கூவாகத்திற்கான ஏற்பாடுகள் படுஜோர்: வீடியோ

விழுப்புரம் மாவட்டத்தில் உள்ள கூவாகம் கூத்தாண்டவர் கோயிலில் அடுத்த மாதம் 8ம் தேதி திருவிழா நடைபெற உள்ளது. அப்போது நடக்கும் மிஸ் கூவாகத்திற்கான ஏற்பாடுகளை திருநங்கைகள் படுஜோராக செய்து வருகின்றனர்.

விழுப்புரம்: இந்த ஆண்டிற்கான கூவாகம் திருவிழா வரும் 8ம் தேதி நடைபெற உள்ளது. விழுப்புரம் மாவட்டம் கூவாகம் கூத்தாண்டவர் கோயில் திருவிழா கடந்த 23 ஆண்டுகளாக சிறப்பாக நடைபெற்று வருகிறது.

இந்த ஆண்டு கோயில் திருவிழாவிற்கான ஏற்பாடு மும்முரமாக நடந்து வருகிறது. அதே நேரத்தில் திருநங்கைகளுக்கான மிஸ் கூவாகம் நிகழ்ச்சி ஏற்பாடுகளும் படுஜோராக நடைபெற்று வருகிறது. இதில், கலை நிகழ்ச்சிகள், தனித் திறமை வெளிப்படுத்துதல், மிஸ் கூவாகம் உள்ளிட்ட பல நிகழ்ச்சிகள் நடைபெற உள்ளது.

இதுகுறித்து தென்னிந்திய திருநங்கைகள் கூட்டமைப்பு ஒருங்கிணைப்பாளர் அருணா செய்தியாளர்களிடம் பேசும் போது, இந்த ஆண்டிற்கான மிஸ் கூவாகம் தேர்வு வரும் 8ம் தேதி நடைபெற உள்ளதாகத் தெரிவித்தார். மேலும், மிஸ் கூவாகம் 2017 பகுதி பகுதியாக பிரிக்கப்பட்டு நடத்தப்பட உள்ளது என்றும், இதில் 8ம் தேதி காலை 10 மணி முதல் 1 மணி வரை முதல் சுற்று போட்டி நடைபெறும் என்றும் கூறிய அருணா, இறுதிச் சுற்று மாலை 6 மணி முதல் இரவு 9 மணி வரை நடத்தப்படும் என்றும் கூறினார்.

கூவாகம் கூத்தாண்டவர் கோயில் திருவிழாவில் மாவட்ட ஆட்சியர் சுப்பிரமணியன், நடிகர் ராகவா லாரன்ஸ், சிலம்பரசன் மற்றும் தொண்டு நிறுவனத்தைச் சேர்ந்தவர்கள், அரசு அதிகாரிகள் உள்ளிட்டோர் கலந்து கொள்ள உள்ளனர். இதுதவிர, வெளிநாடுகளில் இருந்தும், வெளி மாநிலங்களில் இருந்தும் திருநங்கைகள் வர உள்ளதால் பாதுகாப்பு ஏற்பாடுகள் செய்யப்பட்டு வருகின்றன.

English summary

Miss Koovagam will be held on May 8th at Villupuram district in Tamil Nadu.