சட்டசபை திமுக தலைவராக ஸ்டாலின் தேர்வு- எதிர்க்கட்சித் தலைவராகிறார்
சென்னை: சட்டசபை திமுக குழு தலைவராக மு.க.ஸ்டாலின் தேர்ந்தெடுக்கப்பட்டுள்ளார். இதனைத் தொடர்ந்து தமிழக சட்டசபையில் எதிர்க்கட்சித் தலைவராகிறார் மு.க.ஸ்டாலின்.
சட்டசபை தேர்தலில் திமுக 89 இடங்களில் வென்றுள்ள பிரதான எதிர்க்கட்சியாக உருவெடுத்துள்ளது. முதல்வர் ஜெயலலிதா மற்றும் அமைச்சர்கள் நேற்று பதவியேற்றுக் கொண்டனர்.
சட்டசபையின் முதலாவது கூட்டத் தொடர் நாளை தொடங்க உள்ளது. இந்த நிலையில் இன்று சென்னையில் திமுக செயற்குழு மற்றும் எம்.எல்.ஏ.க்கள் கூட்டம் நடைபெற்றது.
திமுக எம்.எல்.ஏ.க்கள் கூட்டத்தில் சட்டசபை குழு தலைவராக மு.க.ஸ்டாலின் ஒருமனதாக தேர்ந்தெடுக்கப்பட்டார். திமுக சட்டசபை குழுவின் துணைத் தலைவராக துரைமுருகன்; கொறடாவாக சக்கரபாணி; துணை கொறடாவாக கு. பிச்சாண்டி ஆகியோர் தேர்ந்தெடுக்கப்பட்டனர்.
திமுக குழுவின் தலைவராக மு.க. ஸ்டாலின் தேர்ந்தெடுக்கப்பட்டுள்ளதால் அவரே சட்டசபையில் பிரதான எதிர்க்கட்சித் தலைவராக செயல்படுவார். கடந்த சட்டசபை தேர்தலில் திமுக 23 இடங்களில்தான் வென்றது. இதனால் எதிர்க்கட்சித் தலைவர் பதவியையும் இழந்திருந்தது. தேமுதிகவின் தலைவர் விஜயகாந்த், பிரதான எதிர்க்கட்சித் தலைவராக இருந்து வந்தார்.
தற்போதைய தேர்தலில் திமுக 89 இடங்களில் வென்று எதிர்க்கட்சித் தலைவர் பதவியை கைப்பற்றியுள்ளது.
Click it and Unblock the Notifications
Sign in with Google