உலகிலேயே தோல்வியையே சந்திக்காத ஒரே தலைவர் கருணாநிதி.. ஸ்டாலின் புகழாரம்!

உலக அளவில் தோல்வியையே சந்திக்காத ஒரே தலைவர் கருணாநிதி என்று மு.க.ஸ்டாலின் புகழ்ந்துள்ளார்.

சென்னை : தமிழக சட்டசபைக்காக நடந்த 13 தேர்தல்களிலும் ஒரு முறைகூட தோல்வியைக் கண்டிராத ஒரே தலைவர் கருணாநிதி என்று மு.க.ஸ்டாலின் புகழ்ந்துள்ளார்.

திமுக தலைவர் கருணாநிதியின் வைரவிழா கொண்டாட்டத்தில் செயல்தலைவர் ஸ்டாலின் விழாப் பேரூரையாற்றினார். அப்போது அவர்"94ம் ஆண்டு பிறந்த நாள் விழா, வைரவிழா இரண்டையும் ஒருங்கிணைத்து நடக்கும் விழாவில் முன்னிலை ஏற்கும் வாய்ப்பை பெற்று, திமுக சார்பில் செயல்தலைவர் என்ற முறையில் அனைவருக்கும் இதயப் பூர்வமான நன்றியை தெரிவித்துக் கொள்கிறேன்.

சட்டமன்றத் தேர்தலில் குளித்துறை தொகுதியில் நிற்க வேண்டும் என்று அண்ணா கருணாநிதிக்கு ஆணையிட்டார். அதனை ஏற்று அவர் சென்றார், நின்றார், வென்றார். இதனைத் தொடர்ந்து 13 தேர்தலிலும் தொடர்ந்து வெற்றி பெற்றிருக்கக்கூடியவர் கருணாநிதி. தோல்வி என்பதே இல்லாமல் வெற்றியையே ருசித்தவர், 48 ஆண்டுகாலம் திமுகவை தொடர்ந்து வழிநடத்திக் கொண்டிருக்கிறார். திராவிட இயக்கம் நூற்றாண்டு விழா காண்கிறது, அதில் 80 வருடங்கள் கருணாநிதி பங்களிப்பு.

19 ஆண்டுகாலம் முதல்வராக இருந்து அதிலும் சாதனை படைத்தவர் கருணாநிதி. வைர விழா அரசியல் கூட்டணிக்கானது என கூறியவர்களுக்கு பதிலளிக்க விரும்பவில்லை. ஏனெனில் அப்படி விமர்சனம் செய்தவர்களுக்கு அடையாளம் தர நான் விரும்பவில்லை. எனவே இந்த மேடையின் கவுரவத்தை நான் குறைக்க விரும்பவில்லை என்று விரும்புவதால் அது குறித்து கருத்து கூற விரும்பவில்லை" என்றார்.

English summary

DMK working president Stalin praises Karunanidhi is not even faced a single failure in his political carrer