கேப்டன்ஜி, ஹேப்பி தமிழ் நியூ இயர்... விஜயகாந்த், பிரேமலதாவை போனில் வாழ்த்திய மோடி

சென்னை: தேமுதிக தலைவர் விஜயகாந்துக்கு பாஜக பிரதமர் வேட்பாளர் நரேந்திர மோடி நேற்று தொலைபேசி மூலம் தனது தமிழ்ப் புத்தாண்டு வாழ்த்தைத் தெரிவித்தார்.

நேற்று முன்தினம் சென்னை பிரச்சாரக் கூட்டத்தில் கலந்து கொண்டார் பாஜக பிரதமர் வேட்பாளர் மோடி. அதற்கு முன்னதாக நடிகர் ரஜினிகாந்தை அவர் சந்தித்துப் பேசினார். ஆனால், உடல்நிலை சரியில்லாததால் பிரச்சாரத்தை ரத்து செய்து விட்டு சென்னையில் இருந்த விஜயகாந்தை அவர் சந்திக்கவில்லை. இதனால் விஜயகாந்த் மனவருத்தத்தில் இருப்பதாகச் சொல்லப் பட்டது.

தேசிய ஜனநாயக் கூட்டணியில் அங்கம் வகிக்கிறது தேமுதிக. மோடியை பிரதமராக்குங்கள் என தனது பிரச்சாரக் கூட்டங்களில் முழங்கி வருகிறார் விஜயகாந்த். இந்நிலையில் விஜயகாந்தை மோடி சந்திக்காததும், மோடி கூட்டத்தில் விஜயகாந்த் பங்கேற்காததும் கூட்டணிக்குள் சலசலப்பை உருவாக்கி விட்டதாகச் சொல்லப் பட்டது.

இந்நிலையில், தமிழ்ப் புத்தாண்டு தினமான நேற்று தொலைபேசி மூலம் தொடர்பு கொண்ட மோடி, விஜயகாந்த் மற்றும் அவரது மனைவி பிரேமலதாவுக்கு புத்தாண்டு வாழ்த்து தெரிவித்ததாக தேமுதிக அலுவலகம் அறிக்கை வெளியிட்டுள்ளது.

மேலும், தேசிய ஜனநாயகக் கூட்டணி வேட்பாளர்களை ஆதரித்து தமிழகம் முழுவதும் பிரசாரம் செய்து வரும் விஜயகாந்த், பிரேமலதாவின் முயற்சிகள் வெற்றிபெற மோடி வாழ்த்தியதாகவும் அதில் தெரிவிக்கப்பட்டுள்ளது.

இதற்கிடையே நாளை சேலத்தில் நடைபெற உள்ள பிரச்சாரக் கூட்டத்தில் மோடியுடன் விஜயகாந்த் பங்கேற்பார் என பாஜக தரப்பில் தெரிவிக்கப் பட்டுள்ளது குறிப்பிடத்தக்கது.

English summary

BJP Prime Ministerial candidate Narendra Modi today called up key NDA ally and chief of DMDK Vijayakanth and extended his wishes for the Tamil New Year.