நீ தூக்குல தொங்குவியா? விஷம் குடிச்சு சாவியா? தீக்குளிக்கிறேன்.. பிரஸ் மீட்டில் சீமான் திடீர் ”ரகளை”
கும்பகோணம்: நாம் தமிழர் கட்சியின் தலைமை ஒருங்கிணைப்பாளர் சீமான் இன்று கும்பகோணத்தில் செய்தியாளர் ஒருவருடன் மிக கடுமையான வாக்குவாதத்தில் ஈடுபட்டது பெரும் அதிர்ச்சியையும் பரபரப்பையும் ஏற்படுத்தியது.
கும்பகோணத்தில் இன்று செய்தியாளர்களை சீமான் சந்தித்தார். இந்த சந்திப்பின் போது, என்னுடன் கூடுகிற கூட்டம் இரண்டு கட்சியும் வேண்டாம் என வெறுத்துப் போய் கூடுகிற கூட்டம். என்னுடைய செல்வாக்கு என்பதே திராவிட கட்சிகளை ஒழிக்கனும்னு நினைக்கிற மக்கள்தான். 60 ஆண்டுகளாக ஆண்டு மக்களை இந்த நிலைக்கு தள்ளிட்டாங்களேன்னு வெறுக்கிற மக்கள்தான் என் பின்னாடி திரளுகிறார்கள் என்றார் சீமான்.
தூக்குல தொங்குறியா? விஷம் குடிக்கிறியா?: அப்போது குறுக்கிட்ட செய்தியாளர் ஒருவர், அப்ப தொகுதிக்கு 3,000 ஓட்டு மட்டும் வாங்கினா போதுமா சார் என கேள்வி கேட்டார். இதனையடுத்து சட்டென கோபமடைந்த சீமான், ஒரு தொகுதிக்கு 26,000 ஓட்டு வாங்கி இருக்கேன்.. நீங்க தூக்குல தொங்குறீங்களா? விஷம் குடிக்கிறீங்களா? 37,000 ஓட்டு வாங்கியிருக்கேன் தூத்துக்குடியில்..விஷம் குடிக்கிறீர்களா? அப்புறம்... என தலையை தூக்கி கையை உயர்த்தி சொடக்குப் போட்டபடி, 3,000 ஓட்டு எந்த தொகுதியில் வாங்கினேன்னு சொல்லுங்க.. நான் தீக்குளிக்கிறேன்.. என்றார். அத்துடன் கையை நீட்டி மிரட்டும் தொனியில் தம்பி.. தம்பி.. ஏய்.. என சொல்ல அப்போதும் செய்தியாளர் குறுக்கிட, இதெல்லாம் பேசக் கூடாது என எச்சரித்தார் சீமான்.
தனிப்பட்ட செல்வாக்குன்னு இல்லை: மேலும் 30,000 ஓட்டு எப்படி வாங்கினேன்? என சீமான் கேட்க, அதை எப்படி உங்க தனிப்பட்ட செல்வாக்குன்னு சொல்ல முடியும் என மீண்டும் செய்தியாளர் குறுக்கு கேள்வி எழுப்பினார். அதற்கு அப்ப 'உங்க செல்வாக்கா என கிண்டலடித்தார் சீமான்.
ஒழுங்கா பேசப் பாருங்க..: அத்துடன் நீங்க கேள்வி கேட்பதாக இல்லை; விதண்டவாதம் செய்யுறதா இருக்கீங்க.. பேட்டி முடிந்த உடன் ரெண்டு பேரும் பேசிப் பார்ப்போம். ஒழுங்கா பேசப் பாருங்க.. 3,000 ஓட்டு முதலில் வாங்கினேன்.. 30,000 ஓட்டு அப்புறம் எப்படி வந்தது? அடுத்த தேர்தலில்? என மீண்டும் சொன்னதையே திரும்ப சொன்னார் சீமான்.
நீ நேர்மையான பத்திரிகையாளனா?: அதற்கும் விடாத செய்தியாளர், தம்பிமார்களின் செயல்பாடுகள் காரணமாக இருக்கலாம் அல்லவா? என்றார். அப்போதும் தங்கச்சிமார்கள் எல்லாம் செயல்படலையா? என நக்கலடித்தார் சீமான். தம்பிமார் செயல்பட்டாலும் மக்கள் வாக்கு தரனும்ல.. மக்கள் வாக்கு தருகிறார்கள்தானே.. திமுக, அதிமுக காசு கொடுக்காம வாக்கு வாங்குனீங்களா? அதை நீ நேர்மையான பத்திரிகையாளன் கேள்வி கேட்பியா? கேட்டு இருக்கீகளா? என்றார். மேலும் எங்க கேட்டீங்க? என்றார்.
உன் பேரு என்ன? அப்ப அப்படித்தான் பேசுவ..: தொடர்ந்து, திராவிட கட்சிகள் காசு கொடுக்கிறாங்களா இல்லையா? என செய்தியாளரிடம் சீமான் கேள்வி கேட்க, நான் இதுவரை பார்த்தது இல்லை என பட்டென அந்த செய்தியாளர் பதில் சொன்னார். உடனே வேறு வேலையை பாருங்க என்ற சீமான், அந்த செய்தியாளரை அழைத்து நீங்க எந்த இதழில் வேலை செய்றீங்க என்றார். அவர் தாம் பணிபுரியும் பத்திரிகையின் பெயரை சொன்ன உடனே, அந்த பத்திரிகை அவ்வளவு கேவலமாக போய்விட்டது என்றார். பின்பு, உங்க பெயர் என்ன என சீமான் கேள்வி கேட்க, சிராஜூதீன் என்றார் அந்த செய்தியாளர். உடனே, அப்ப நீ பேசுவ? என மீண்டும் சீண்ட இருவருக்கும் இடையே வாக்குவாதம் நடந்தது. ஒரே ரகளையப்பா!
Click it and Unblock the Notifications
Sign in with Google