என்.எல்.சி பெயரை மாற்றினால் பெரும் போராட்டம் வெடிக்கும்- மத்திய அரசுக்கு வேல்முருகன் எச்சரிக்கை

Updated: Monday, March 21, 2016, 17:01 [IST]

Subscribe to Oneindia Tamil

சென்னை: நெய்வேலியில் அமைந்துள்ள என்.எல்.சி நிறுவனத்தின் பெயரை மாற்றினால் பெரிய போராட்டம் வெடிக்கும் என மத்திய அரசுக்கு தமிழக வாழ்வுரிமைக் கட்சியின் தலைவர் பண்ருட்டி தி.வேல்முருகன் எச்சரிக்கை விடுத்துள்ளார்.

இதுகுறித்த அவரது அறிக்கையில், "இந்திய பொதுத்துறை நிறுவனங்களில் நவரத்னா தகுதியைப் பெற்ற நெய்வேலி பழுப்பு நிலக்கரி நிறுவனம் தமிழகத்தின் பெருமைக்குரிய சின்னம்

Never change the name of NLC - Velmurugan

நெய்வேலி பழுப்பு நிலக்கரி நிறுவன மின்சாரம்தான் தமிழகம் உள்ளிட்ட தென்மாநிலங்களுக்கு மின்சாரத்தை வழங்கி வருகிறது. இந்த நிறுவனம் உருவாவதற்கான பல்லாயிரக்கணக்கான மக்கள் தங்கள் நிலங்களை குடியிருப்புகளை தாரைவார்த்து கொடுத்துவிட்டு இன்னமும் உரிய நீதி கிடைக்காமல் போராடி வருகின்றனர்.

பல்லாயிரக்கணக்கான தொழிலாளர்கள் இன்னமும் ஒப்பந்த தொழிலாளர்களாகவே இருந்து வருகின்றனர். நிலம் கொடுத்த மக்களும் ஒப்பந்த தொழிலாளர்களும் முன்வைக்கிற எந்த கோரிக்கைக்கும் தீர்வு காண மறுத்து வருகிறது நெய்வேலி பழுப்பு நிலக்கரி நிறுவனம். இதை கண்டுகொள்ளாமல் இருக்கிறது மத்திய அரசு.

அதே நேரத்தில் தொடர்ச்சியாக நெய்வேலி பழுப்பு நிலக்கரி நிறுவனத்தின் பங்குகளை தனியாருக்கு தாரை வார்ப்பதில் மத்தியில் அமையும் காங்கிரஸ் மற்றும் பாஜக அரசுகள் முனைப்பு காட்டி வருகின்றன. இதை ஒட்டுமொத்த தமிழகம் போராடி தடுத்து வருகிறது.

இப்படி நெய்வேலி பழுப்பு நிலக்கரி நிறுவனத்தை தனியாருக்கு விற்கவும், நெய்வேலி பழுப்பு நிலக்கரி நிறுவனத்தில் இருந்து ஒட்டுமொத்த தமிழர்களை வெளியேற்றி வட இந்தியர்களை நியமிக்கும் வஞ்சகத்தை அரங்கேற்றவும் ஏதுவாகவே தற்போது பெயர் மாற்ற நடவடிக்கையை மத்திய அரசு மேற்கொண்டு வருகிறது.

நெய்வேலி பழுப்பு நிலக்கரி நிறுவனம் என்பது பொதுத்துறை நிறுவனமாக இருந்தாலும் தமிழரின் உழைப்பில் நிமிர்ந்து நிற்கும் நிறுவனம். இந்நிறுவனத்தின் பெயரை மாற்றும் எந்த ஒரு முயற்சியையும் தமிழக வாழ்வுரிமைக் கட்சி மிகக் கடுமையாக எதிர்த்து போராடும் என்பதை எச்சரிக்கையாகவே தெரிவித்துக் கொள்கிறேன்.

ஆகையால் இந்த பெயர் மாற்றம் தொடர்பான ஆலோசனை கேட்கும் நடவடிக்கைகளை உடனே மத்திய அரசு நிறுத்த வேண்டும்; இல்லையெனில் தமிழக வாழ்வுரிமைக் கட்சி அதை நிறுத்த வைக்கும் போராட்டங்களை கையிலெடுக்கும் என்றும் எச்சரிக்கிறேன்" என்று தெரிவித்துள்ளார்.