ஜெ. பிறந்தநாள்: தொண்டர்கள் வாழ்த்த அதிமுக ஐ.டி அணியின் ஸ்பெஷல் ஏற்பாடு

சென்னை: மிஸ்டு கால் மூலம் தேர்தல் பிரச்சாரத்தை திமுக தலைவர் கருணாநிதி ஆரம்பித்துள்ள நிலையில் ஜெயலலிதாவின் பிறந்தநாளுக்கு புது டெக்னிக் ஒன்றை அறிமுகம் செய்துள்ளது அதிமுகவின் ஐ.டி. அணி. மகம் நட்சத்திர பிறந்தநாளான நேற்று மட்டும் 6 லட்சம் பேர் முதல்வர் ஜெயலலிதாவிற்கு வாழ்த்து கூறியுள்ளதாக அதிமுக ஐ.டி அணியினர் தெரிவித்துள்ளனர்.

முதல்வர் ஜெயலலிதாவின், 68வது பிறந்த நாள் விழா, பிப்ரவரி 24ம் தேதி கொண்டாடப்படுகிறது. அதற்கு முன்னதாக அவர் பிறந்த மகம் நட்சத்திர தினத்தை சிறப்பாக கொண்டாடியுள்ளனர் அதிமுகவினர்.

முதல்வருக்கு பிறந்த நாள் வாழ்த்து தெரிவிக்க விரும்புவோர், மொபைல் போன் எண், 77670 20002; டெலிபோன் எண் 044 - 3312 4234 ஆகியவற்றில் வாழ்த்து தெரிவிக்க, தகவல் தொழில்நுட்ப அணி ஏற்பாடு செய்துள்ளது.

இதன் மூலம் நேற்று ஒரே நாளில் 6 லட்சம் பேர் பிறந்தநாள் வாழ்த்து கூறியுள்ளதாக அதிமுக ஐ,டி அணியினர் தெரிவித்துள்ளனர். இந்த எண்களை தொடர்பு கொண்டால், 'முதல்வருக்கு பிறந்த நாள் வாழ்த்து கூற அழைத்தமைக்கு நன்றி' என, பெண் குரல் ஒலிக்கும். தொடர்ந்து, அழைத்தவர் தன் பெயர் மற்றும் முகவரியை தெரிவிக்கலாம்; அது பதிவு செய்யப்படும். இதன்மூலம், எத்தனை பேர் முதல்வருக்கு நன்றி தெரிவிக்கின்றனர் என்பதை அறிந்து கொள்ள முடியும்.

டெலிபோன் எண்ணில் கடைசி மூன்று எண்கள், தமிழகத்தில் உள்ள, 234 தொகுதிகளையும், அதற்கு முந்தைய, 24, முதல்வர் பிறந்த நாளையும், குறிப்பதாக அமைந்து உள்ளது. இந்த மொபைல் போன் மற்றும் டெலிபோன் எண்களை, 5 லட்சம் மொபைல் போன் எண்களுக்கு, 'வாட்ஸ் ஆப்' மூலம், தகவல் தொழில்நுட்ப அணியினர் பரப்பி உள்ளனர்.

இதுதவிர, 'பேஸ்புக், டுவிட்டர்' போன்ற சமூக வலைதளங்களிலும் பிரபலப்படுத்தி உள்ளனர். முதல்வருக்கு பிறந்த நாள் வாழ்த்து கூறியவர்கள் எண்ணிக்கையிலும் சாதனை படைக்க, அ.தி.மு.க., முடிவு செய்துள்ளது.

English summary

Over six lakh well wishers greeted Chief Minister and AIADMK general secretary J Jayalalithaa on ‘Maasi Magam’, her birth star, by dialling either 7767020002 or 044-33124234 set up by the Information Technology wing of the party.