முதல்வர் நாராயணசாமி தலைமையிலான புதுவை அமைச்சரவை பட்டியல் வெளியீடு !

புதுவை: முதல்வர் நாராயணசாமி தலைமையிலான புதுச்சேரி மாநில அமைச்சரவை பட்டியல் வெளியிடப்பட்டுள்ளது. அதில் நிதி, பொது நிர்வாகம், உள்துறை, இந்து சமய அறநிலையத் துறையை தன் வசம் கொண்டுள்ளார் நாராயணசாமி.

புதுச்சேரி சட்டசபைத் தேர்தலில் திமுகவுடன் கூட்டணி அமைத்து காங்கிரஸ் போட்டியிட்டது. இக்கூட்டணிக்கு 17 இடங்களில் வெற்றி கிடைத்தது. இதையடுத்து கடந்த 6 ஆம் தேதி நாராயணசாமி தலைமையிலான அமைச்சரவை பதவியேற்றது. முதல்வராக நாராயணசாமி பதவிப்பிரமாணம் எடுத்துக்கொண்டார்.

அதைத் தொடர்ந்து அமைச்சர்களாக மாநில காங்கிரஸ் தலைவர் நமச்சிவாயம், மல்லாடி கிருஷ்ணா ராவ், கந்தசாமி, ஷாஜகான், கமலக்கண்ணன் ஆகியோரும் பதவிப்பிரமாணம் எடுத்துக் கொண்டனர். மல்லாடி கிருஷ்ணா ராவ் தெலுங்கில் பதவிப்பிரமாணம் எடுத்துக் கொண்டார். அமைச்சராகப் பதவியேற்றுள்ள ஷாஜகான், மறைந்த கேரள மாநில முன்னாள் ஆளுநர் எம்.ஓ.எச். பாரூக் மரைக்காயரின் மகன் ஆவார். பதவியேற்ற அமைச்சர்களுக்கான இலாக்காக்கள் ஒதுக்கப்படாமல் இருந்தது.

இந்நிலையில் முதல்வர் நாராயணசாமி தலைமையிலான அமைச்சரவை பட்டியல் இன்று வெளியிடப்பட்டுள்ளது.

அதன் விவரம்:

நாராயணசாமி - நிதி, பொது நிர்வாகம், உள்துறை, இந்து சமய அறநிலையத் துறை

நமச்சிவாயம் - பொதுப்பணித் துறை, மக்கள் நல்வாழ்வு, கால்நடைத் துறை

மல்லாடி கிருஷ்ணராவ் - சுற்றுலா துறை, வீட்டு வசதி, மீன்வளம், இளைஞர் நலன் துறை

ஷாஜகான் - வருவாய்த் துறை, தகவல் தொழில் நுட்பம், போக்குவரத்து துறை

கந்தசாமி - சமூக நலன், தொழிலாளர் நலன், பொது விநியோகத் துறை

கமலக்கண்ணன் - மின்சாரம், கல்வி, வேளாண்மை துறை

English summary

list of ministers in Narayanasamy cabinet in puducherry