ம.ந.கூட்டணிக்கு வாங்க... ஜி.கே.வாசனுக்கு வைகோ, திருமா, ஜி.ஆர். முத்தரசன் நேரில் அழைப்பு

By Mathi

Updated: Friday, January 1, 2016, 16:48 [IST]

Subscribe to Oneindia Tamil

சென்னை: தமிழ் மாநில காங்கிரஸ் தலைவர் ஜி.கே.வாசனை மக்கள் நலன் கூட்டணியின் தலைவர்கள் வைகோ, திருமாவளவன், ராமகிருஷ்ணன், முத்தரசன் ஆகியோர் நேரில் சந்தித்து தங்களது அணியில் இணையுமாறு அழைப்பு விடுத்தனர்.

சட்டசபை தேர்தலில் தி.மு.க.- அ.தி.மு.க, பா.ஜ.க, பா.ம.க. அல்லாத கட்சிகளை ஒருங்கிணைக்கும் வகையில் மக்கள் நலக் கூட்டணி உருவாக்கப்பட்டது. இதில் இடதுசாரிகள், மதிமுக மற்றும் விடுதலை சிறுத்தைகள் இடம்பெற்றுள்ளன. இந்த அணியின் ஒருங்கிணைப்பாளராக வைகோ இருந்து வருகிறார்.

இக்கூட்டணியில் இணையுமாறு தேமுதிக தலைவர் விஜயகாந்த்தை வைகோ உள்ளிட்டோர் நேரில் சென்று அழைத்திருந்தனர். ஆனால் விஜயகாந்த்தோ உங்கள் கூட்டணி போனியாகாது; வாங்க தி.மு.கவுடன் கூட்டணி அமைக்கலாம் என ஒரே போடாக போட்டார்.

இதனால் அதிர்ச்சியடைந்து போன வைகோ உள்ளிட்ட மக்கள் நலக் கூட்டணி தலைவர்கள் விஜயகாந்த் பக்கமே எட்டிப்பார்க்கவில்லை. இந்த நிலையில் இன்று சென்னை தேனாம்பேட்டையில் த.மா.கா. தலைவர் ஜி.கே.வாசனை நேரில் சந்தித்து பேசினர்.

இச்சந்திப்பின் போது, மக்கள் நலக் கூட்டணியில் இணையுமாறு வாசனுக்கு அனைவரும் அழைப்பு விடுத்தனர். இது தொடர்பாக கட்சியினருடன் கலந்து ஆலோசித்து முடிவு சொல்வதாக வாசன் கூறியுள்ளார்.