புத்தாண்டில் ரசிகர்களை நேரில் சந்தித்து வாழ்த்துச் சொன்ன ரஜினி!

புத்தாண்டு தினமான இன்று தனது போயஸ் கார்டன் இல்லத்தில் ரசிகர்களைச் சந்தித்து வாழ்த்துக் கூறினார் ரஜினிகாந்த்.

விசேஷ நாட்கள், ரஜினியின் பிறந்த நாள் அன்று மட்டுமல்ல, புத்தாண்டு, பொங்கல் போன்ற பண்டிகை நாட்களிலும் ரஜினி வீட்டு முன் ரசிகர்கள் திரண்டு போய் வாழ்த்துச் சொல்வது வழக்கம்.

இது போன்ற விசேஷ நாட்களில் ரஜினி வீட்டிலிருந்தால், ரசிகர்களைச் சந்தித்து வாழ்த்துக் கூறி அனுப்புவது வழக்கம். அவர் வீட்டில் இல்லாத நேரங்களில் அவர் சார்பில் லதா ரஜினி வாழ்த்துகள் சொல்லி, இனிப்புக் கொடுத்து அனுப்புவார். புத்தாண்டு தினமான இன்று ரஜினியை நேரில் சந்தித்து வாழ்த்துகள் பெற ஏராளமான ரசிகர்கள் போயஸ் கார்டன் இல்லத்தின் முன் திரண்டனர்.

ரசிகர்கள் வந்திருக்கும் செய்தியை அறிந்ததும், அவர்களைச் சந்தித்து வாழ்த்துக் கூற விரும்பிய ரஜினி, அதற்கான ஏற்பாடுகளைச் செய்ய உத்தரவிட்டார். அவர்களை ரசிகர் மன்றப் பொறுப்பாளர் சுதாகர் ஒழுங்குபடுத்தி கொண்டிருந்தார்.

சில நிமிடங்களில் வீட்டிலிருந்து வெளியில் வந்தார் ரஜினி. அவரைப் பார்த்ததும் ரசிகர்கள் உற்சாகமாக வாழ்த்துக்களைக் கூற, ரஜினியும் தனது வாழ்த்துகளைத் தெரிவித்துக் கொண்டார். கைகளைக் கூப்பியபடி ரஜினி சில நிமிடங்கள் நின்று விட்டு பின்னர் வீட்டுக்குள் சென்றார். இது ரசிகர்களுக்கு கொண்டாட்டமாவும் உற்சாகமாகவும் அமைந்தது.

English summary

Rajinikath has met his fans today at his Poes Garden Residence and conveyed his new year wishes.