இனிமே "இராசாசி" கிடையாது... "இராஜாஜி"க்கு மாறுகிறது மதுரை அரசு மருத்துவமனையின் பெயர்!

மதுரை இராசாசி மருத்துவமனை இனி இராஜாஜி மருத்துவமனையாகிறது.

மதுரை: மதுரை இராசாசி மருத்துவமனை இனி இராஜாஜி மருத்துவமனை என்றே குறிப்பிடப்படும் என தெரிவிக்கப்பட்டுள்ளது.

மதுரை டி.வி.எஸ். நகரை சேர்ந்த வக்கீல் ஆர்.லெட்சுமிநாராயணன். இவர் கடந்த ஒன்றரை ஆண்டுகளுக்கு முன்பு, மதுரை மாவட்ட ஆட்சியர், அரசு மருத்துவமனை டீன் உள்ளிட்ட பலரிடமும், மனு ஒன்றினை கொடுக்க ஆரம்பித்தார்.

அதில், மதுரை அரசு மருத்துவமனையில் 4 இடங்களில் உள்ள பெயர் பலகைகளில் 'இராசாசி' என்று இருப்பதாகவும், அதனை மாற்றி 'இராஜாஜி' என்றே வைக்க வேண்டும். மேலும் இராஜாஜி பிறந்த தொரப்பள்ளியில் உள்ள அவரது வீட்டில் வைத்திருக்கும் பெயர் பலகையில் கூட இராஜாஜி என்றே எழுதியுள்ளது. எனவே அனைத்து இடங்களிலும் அவரது பெயரை இராஜாஜி என்றே குறிப்பிட வேண்டும் என்று கேட்டு கொண்டிருந்தார்.

இந்நிலையில் அரசு மருத்துவமனை பெயரில் இராசாசி என்றிருப்பதை இராஜாஜி என மாற்றம் செய்யுமாறு தெரிவிக்கப்பட்டுள்ளது. மதுரை அரசு மருத்துவமனை டீன் மருதுபாண்டியன் பொதுப்பணி செயற்பொறியாளருக்கு இதனை கடிதம் மூலமாக தெரிவித்துள்ளார்.

அரசு மருத்துவமனையின் பெயர் பலகையில் திருத்தம் செய்து அரசு இராஜாஜி மருத்துவமனை என்று சரியான பெயர் பலகை பொருத்த நடவடிக்கை எடுக்குமாறு அந்த கடிதத்தில் அவர் வலிறுத்தியுள்ளார். இதன்மூலம் இராசாசி என்ற பெயர் ஒன்றரை வருட போராட்டத்திற்கு பின்னர் இராஜாஜி என்றே மாற்றப்பட உள்ளது.

English summary

Rasasi Hospital becomes Rajaji in Madurai