'பிரவோக் லைப் ஸ்டைல்' பத்திரிகைக்குதான் 'சசிகலா' முதல் பேட்டி!
அரசியல் பிரச்சனைகள் குறித்து எந்த கருத்தும் தெரிவிக்காதவர் சசிகலா. அதிமுக தலைமையை ஏற்க நினைக்கும் சசிகலா பிரவோக் லைப் ஸ்டைல் என்ற மாத இதழுக்கு பேட்டி கொடுத்திருக்கிறார்.
சென்னை: அதிமுக தலைமையை ஏற்க துடிக்கிற இதுவரை ஊடகங்களில் பேசாத சசிகலாவின் முதல் பேட்டி அதிகம் அறியப்படாத பிரவோக் லைப்ஸ்டைல் என்ற ஆங்கில பத்திரிகைக்கு கொடுத்திருக்கிறாராம். ஜனவரி மாத இதழில் இந்த பேட்டி வர உள்ளதாக அறிவிக்கப்பட்டுள்ளது.
சசிகலாவை ஊடக அதிபர்கள், மூத்த பத்திரிகையாளர்கள் பலரும் சந்தித்து வருகின்றனர். பிரவோக் லைப் ஸ்டைல் ஆங்கில மாத இதழ் குழுமத்தினரும் சசிகலாவை சந்தித்து புகைப்படங்களை வெளியிட்டிருந்தனர்.
ஆனாலும் ஊடகங்களை சந்தித்து இதுவரை எதுவுமே பேசவில்லை சசிகலா. அரசியல் மேடை ஏறாத, ஊடகங்களிடம் பேசாத ஒருவரை எப்படி மாபெரும் அரசியல் கட்சிக்கு தலைமை ஏற்க சொல்லலாம் என்ற விமர்சனங்களும் வந்து கொண்டிருக்கின்றன.
இந்த நிலையில் பிரவோக் லைப் ஸ்டைல் என்ற லைப் ஸ்டைல் ஆங்கில மாத இதழ் தங்களுக்கு சசிகலா பேட்டி கொடுத்திருப்பதாகவும் அது ஜனவரி மாதம் வெளியாகும் எனவும் சமூக வலைதளங்களில் செய்தி வெளியிட்டிருக்கிறது. பால்சன்ஸ் என்ற குழுமம் இந்த லைப் ஸ்டைல் மாத இதழை வெளியிட்டு வருகிறது.