சீமான் மோதல்! நாதகவில் இருந்து சாட்டை துரைமுருகன் விலகல்? எக்ஸ் பக்கத்தில் 'கொபசெ' நீக்கம்

Updated: Wednesday, April 16, 2025, 21:01 [IST]

Subscribe to Oneindia Tamil

சென்னை: நாம் தமிழர் கட்சியில் இருந்து அக்கட்சியின் கொள்கை பரப்புச் செயலாளரான சாட்டை துரைமுருகன் விலகக் கூடும் என தெரிகிறது. சாட்டை துரைமுருகன் தமது எக்ஸ் பக்கத்தில் நாதக கொள்கை பரப்புச் செயலாளர் என பதிவிட்டிருந்ததை திடீரென நீக்கி இருப்பதைத் தொடர்ந்து அக்கட்சியைவிட்டு வெளியேற இருப்பதாக தகவல்கள் வெளியாகி உள்ளன.

நாம் தமிழர் கட்சியின் கொள்கை பரப்புச் செயலாளராகவும் தலைமை ஒருங்கிணைப்பாளர் சீமானின் வலதுகரமாகவும் இருப்பவர் சாட்டை துரைமுருகன். நாம் தமிழர் கட்சியை உருவாக்கிய, வளர்த்த பல மூத்த நிர்வாகிகள் அக்கட்சியைவிட்டு வெளியேறும் போது சாட்டை துரைமுருகனின் 'மேலாதிக்கம்' குறித்து விமர்சனங்களையும் முன்வைத்திருந்தனர்.

தற்போது நாம் தமிழர் கட்சியில் சீமானுக்கு அடுத்த நிலையில் சாட்டை துரைமுருகன் இருந்து வருகிறார். சீமானின் நடிகை விவகாரத்திலும் சாட்டை துரைமுருகனின் பெயர் அடிபட்டது. தமிழ்நாடு முதல்வர் மு.க.ஸ்டாலின் உள்ளிட்டோரை இழிவாக பேசி வழக்குகளை எதிர்கொண்டவர் சாட்டை துரைமுருகன்.

இந்த நிலையில் நாம் தமிழர் கட்சியின் தலைமை ஒருங்கிணைப்பாளர் சீமான் நேற்று ஒரு அறிக்கை வெளியிட்டார். சாட்டை துரைமுருகன் இந்த அறிக்கையை தமது எக்ஸ் பக்கத்தில் பதிவிட்டிருந்தார். அதில், சாட்டை துரைமுருகன் நடத்தும் யூ டியூப் சேனலுக்கும் நாம் தமிழர் கட்சிக்கும் எந்த தொடர்பும் இல்லை; அதில் இடம் பெறும் கருத்துகளுக்கு நாம் தமிழர் கட்சி பொறுப்பேற்காது என சீமான் அறிவித்திருந்தார்.

அண்மைக்காலமாக, சாட்டை துரைமுருகன் தமது யூ டியூப் சேனலில் பல்வேறு சர்ச்சைக்குரிய கருத்துகளை வெளியிட்டு வந்தார். தமிழ்நாடு பாஜக தலைவர் நயினார் நாகேந்திரன், இந்துத்துவவாதி அல்ல; அனைவருக்கும் பொதுவானவர் என ஆதரவு தெரிவித்திருந்தார். அதேபோல தேடப்படும் பாலியல் குற்றவாளியான சர்ச்சைக்குரிய சாமியார் நித்தியானந்தாவிடம் ஆன்லைனில் சாட்டை துரைமுருகன் தமது யூ டியூப் சேனலுக்காக கேள்வி கேட்டிருந்தார். மேலும் தாது மணல் கொள்ளை தொடர்பாகவும் ஒரு வீடியோ பதிவிட்டிருந்தார். இவை அனைத்தும் சீமானுக்கு கடும் நெருக்கடியையும் நாம் தமிழர் கட்சி மீது கடுமையான விமர்சனங்களையும் உருவாக்கியதாகவும் கூறப்படுகிறது.

இந்த நிலையில் சாட்டை துரைமுருகன் திடீரென தமது சமூக வலைதளப் பக்கத்தில், நாதகவின் கொள்கை பரப்புச் செயலாளர் பதவி உள்ளிட்ட நாம் தமிழர் கட்சியின் அடையாளங்களை நீக்கி இருக்கிறார்; அத்துடன் சுதந்திரமாக இருப்பது போன்ற படம் ஒன்றையும் முகப்புப் படமாக வைத்துள்ளார்; இதனால் நாம் தமிழர் கட்சியில் இருந்து சாட்டை துரைமுருகன் வெளியேறுகிறாரா? அல்லது நீக்கப்படுகிறாரா? என்கிற விவாதமும் நடைபெற்று வருகிறது.