அப்பல்லோவுக்கு வந்த செந்தில் பாலாஜி, ஏ.கே.போஸ்.. ஜெ. சந்திப்பாரா.. ஆசி கிடைக்குமா?

முதல்வர் ஜெயலலிதாவிடம் ஆசி வாங்குவதற்காக இடைத்தேர்தலில் வெற்றி பெற்ற செந்தில் பாலாஜி , ஏ.கே. போஸ் அகியோர் இன்று அப்பல்லோ மருத்துவமனைக்கு வருகை தந்தனர்.

By Mayura Akilan

Updated: Thursday, November 24, 2016, 3:21 [IST]

Subscribe to Oneindia Tamil

சென்னை: அரவக்குறிச்சி, தஞ்சாவூர், திருப்பரங்குன்றம் ஆகிய 3 சட்டப்பேரவை தொகுதிகளுக்கான வாக்குப்பதிவு கடந்த 19ம் தேதி நடைபெற்றது. இதற்கான வாக்கு எண்ணிக்கை நேற்று நடைபெற்றது. இதில் 3 தொகுதிகளிலும் அதிமுக வேட்பாளர்கள் அமோக வெற்றி பெற்றுள்ளனர்.

அரவக்குறிச்சி தொகுதியில் வெற்றி பெற்று எம்.எல்.ஏவான செந்தில் பாலாஜியும், திருப்பரங்குன்றம் எம்.எல்.ஏவாக வெற்றி பெற்ற ஏ.கே.போஸ் ஆகியோர் இன்று முதல்வரை சந்திப்பதற்காக அப்பல்லோ மருத்துவமனைக்கு வருகை தந்தனர்.

அப்பல்லோவிற்கு வருகை

தேர்தலில் வெற்றி பெற்ற உடன் கட்சியின் பொதுச்செயலாளரிடம் ஆசி பெறுவது வழக்கம். முதல்வர் ஜெயலலிதா உடல்நலக்குறைவு காரணமாக அப்பல்லோ மருத்துவமனையில் அனுமதிக்கப்பட்டுள்ள நிலையில் அவரை சந்திக்க இன்று வெற்றி பெற்ற எம்.எல்.ஏக்கள் மருத்துவமனைக்கு வந்தனர்.

செந்தில் பாலாஜி

அரவக்குறிச்சி தொகுதியில் அதிமுக அமைச்சர்கள் 11 பேர், எம்.எல்.ஏக்கள், எம்.பிக்கள் அனைவரும் தீவிர தேர்தல் பிரச்சாரம் செய்து முன்னாள் அமைச்சர் செந்தில்பாலாஜியை 23,673 வாக்குகள் வித்தியாசத்தில் வெற்றி பெற வைத்துள்ளனர்.

ஏகே போஸ்

திருப்பரங்குன்றம் தொகுதியில் அமைச்சர் ஓ.பி.எஸ். தலைமையில் அமைச்சர்களும் அதிமுக நிர்வாகிகளும் தீவிர தேர்தல் பிரச்சாரம் செய்து, திமுக வேட்பாளரான டாக்டர் சரவணனை தோல்வியுறச் செய்து அதிமுக வேட்பாளரான ஏ.கே.போஸ் வெற்றி பெற பாடுபட்டிருக்கிறார்கள். 42670 வாக்குகள் வித்தியாசத்தில் வென்றுள்ளார் ஏ.கே. போஸ்.

மெகா வெற்றி

மூன்று தொகுதிகளிலுமே அதிமுகவுக்கு கிடைத்திருப்பது மெகா வெற்றிதான். வெற்றியை வரவேற்று உடனடியாக அறிக்கை வெளியிட்டார் ஜெயலலிதா. எப்படியாவது அப்பல்லோவுக்கு அழைத்தாவது அம்மா நம்மை சந்திப்பார் என்று வெற்றி பெற்ற மூவரும் காத்திருக்க, செல்போனில் அழைத்து நேற்று மாலை வாழ்த்து சொன்னாராம் சசிகலா. இன்று அப்பல்லோவிற்கு வந்துள்ள இருவரும் முதல்வர் ஜெயலலிதாவிடம் ஆசி பெறுவார்களா? அல்லது சின்னம்மா சசிகலாவிடம் மட்டுமே ஆசி பெற்று செல்வார்களா?