'வைரம்' இல்லாத வைரவிழா: கருணாநிதியிடம் அழைப்பிதழை அளித்தார் ஸ்டாலின்!
சட்டப்பேரவையில் அடியெடுத்துவைத்து 60 ஆண்டு நிறைவடையும் வைரவிழா அழைப்பிதழை திமுக தலைவர் கருணாநிதியிடம் அக்கட்சியின் செயல் தலைவர் ஸ்டாலின் வழங்கினார்.
சென்னை : சென்னையில் ஜுன் 3ம் தேதி நடைபெற உள்ள திமுக தலைவர் கருணாநிதிக்கான வைரவிழா கொண்டாட்ட அழைப்பிதழை அவரிடம் இன்று ஸ்டாலின் நேரில் அளித்தார்.
தி.மு.க தலைவர் கருணாநிதி, தமிழக சட்டமன்றத்திற்குள் எம்எல்ஏ-வாக அடியெடுத்து வைத்து, 60 ஆண்டுகள் நிறைவடைகின்றன. இதை வைரவிழாவாகக் கொண்டாட முடிவுசெய்து, கட்சியின் செயல் தலைவர் ஸ்டாலின் தலைமையில், தி.மு.க-வினர் உற்சாகமாக வேலைசெய்து வருகின்றனர்.
அடுத்த மாதம் 3ம் தேதி கருணாநிதி தனது 94வது வயதில் அடியெடுத்து வைக்கிறார். இதனை முன்னிட்டு வைரவிழா கொண்டாட்டம் சென்னை ஒய்எம்சிஏ மைதானத்தில் சிறப்பாக கொண்டாடப்பட உள்ளது. சட்டமன்ற வடிவில் அமைக்கப்பட்டுள்ள பிரம்மாணட விழா அரங்கில் உடல்நலக் குறைவு காரணமாக வைர விழா நாயகன் கருணாநிதி பங்கேற்க மாட்டார் என்று ஸ்டாலின் ஏற்கனவே தெரிவித்துள்ளார்.
மேலும் இந்த நிழ்ச்சியில் பங்கேற்க பாஜக அல்லாத தேசிய கட்சிகளுக்கு அழைப்புவிடுக்கப்பட்டுள்ளது. இதன்படி ராகுல்காந்தி, லாலு பிரசாத் யாதவ், டி.ராஜா, நிதிஷ் குமார், சீதாராம் யெச்சூரி உள்ளிட்டோர் பங்கேற்பார்கள் என்று அறிவிக்கப்பட்டுள்ளது. மேலும் அண்டை மாநில முதல்வர்களும் இந்த நிகழ்ச்சியில் பங்கேற்பார்கள் என்று தெரிகிறது.
'மருத்துவர்கள் அனுமதித்தால், கருணாநிதி விழாவில் பங்கேற்பார்' என மு.க.ஸ்டாலின் கூறியுள்ள நிலையில் சென்னை கோபாலபுரம் வீட்டில் உள்ள கருணாநிதியை, மு.க.ஸ்டாலினும் துரைமுருகனும் சந்தித்தனர். வைரவிழாவுக்கான அழைப்பிதழை அப்போது அவர்கள் கருணாநிதியிடம் அளித்துள்ளனர். அதன் புகைப்படம் தற்போது வெளியிடப்பட்டுள்ளது.
Click it and Unblock the Notifications
Sign in with Google