அன்புமணியைத் தொடர்ந்து ராமதாஸையும் சந்தித்தார் ஸ்டாலின்!

Updated: Tuesday, May 19, 2015, 12:44 [IST]

Subscribe to Oneindia Tamil

சென்னை: பாமக நிறுவனர் ராமதாஸைச் சந்தித்து அருள்நிதியின் திருமண அழைப்பிதழை அளித்தார் திமுக பொருளாளர் ஸ்டாலின்.

திமுக பொருளாளர் மு.க. ஸ்டாலினின் சகோதரர் மு.க. தமிழரசுவின் மகன் அருள்நிதி திருமணம் வரும் ஜூன் மாதம் நடக்கிறது. இதையொட்டி மு.க. ஸ்டாலின், தமிழக அரசியல் கட்சி தலைவர்கள் மற்றும் முக்கிய பிரமுகர்களை நேரில் சந்தித்து திருமண அழைப்பிதழை கொடுத்து வருகிறார்.

விஜயகாந்த், இளங்கோவன், ஜி.கே.வாசன், வைகோ, அன்புமணி ஆகியோரை நேரில் சென்று அழைப்பிதழ் கொடுத்த ஸ்டாலின், இன்று சுப்பிரமணியன் சாமியையும் நேரில் சந்தித்து அழைப்பு விடுத்தார்.

அதனைத் தொடர்ந்து திண்டிவனம் அருகே தைலாபுரம் சென்ற ஸ்டாலின், அங்கு பாமக நிறுவனர் ராமதாஸைச் சந்தித்து அழைப்பிதழ் கொடுத்தார்.

பின்னர் செய்தியாளர்களைச் சந்தித்த ஸ்டாலின், ‘ஆர்.கே.நகர் தொகுதிக்கு இடைத்தேர்தல் தேதி அறிவித்த பிறகு திமுக நிலையை கட்சித் தலைவர் கலைஞர் அறிவிப்பார். அரசியலுக்கு அப்பாற்பட்டு குடும்ப நிகழ்ச்சிக்காக ராமதாசை சந்தித்தேன்' என்றார்.

அன்புமணி ராமதாஸிற்கும், ஸ்டாலினுக்கும் இடையே அறிக்கை போர் நடந்து வரும் சூழலில், நேற்று அன்புமணியையும் சந்தித்து அழைப்பிதழ் கொடுத்தார் ஸ்டாலின். இந்நிலையில், இன்று ராமதாஸை அவர் சந்தித்துள்ளார்.