விவேக் ஜெயராமனுக்கு வேட்டு வைக்கும் ஓபிஎஸ்... ஜாஸ் சினிமாஸில் வேட்டை வேட்டை ஆரம்பம்?

தினகரனுக்கு முட்டுக் கொடுத்துக் கொண்டிருக்கும் விவேக் ஜெயராமனை குறிவைத்துக் கொண்டிருக்கிறதாம் ஓபிஎஸ் கோஷ்டி.

Updated: Tuesday, April 25, 2017, 20:08 [IST]

Subscribe to Oneindia Tamil

சென்னை: ஜெயா டிவி, நமது எம்ஜிஆர் மூலம் குடைச்சல் கொடுத்து வரும் இளவரசி மகன் விவேக் ஜெயரமானுக்கு வேட்டு வைக்கும் முயற்சிகளில் ஓபிஎஸ் கோஷ்டி மும்முரமாக இறங்கியுள்ளதாக தகவல்கள் வெளியாகி உள்ளன.

ஓபிஎஸ், எடப்பாடி கோஷ்டிகளை இணையவிடாமல் தினகரன் கோஷ்டி குறுக்குசால் ஓட்டிக் கொண்டிருக்கிறது. அதிலும் ஜெயா டிவி மற்றும் நமது எம்ஜிஆர் பத்திரிகைகள் மூலமாகவே தினகரன் கோஷ்டி இந்த சித்து விளையாட்டுகளை அரங்கேற்றி வருகிறது.

தினகரன் கோஷ்டியின் மிகப் பெரிய ஆயுதங்களாக இருக்கும் ஜெயா டிவி, நமது எம்ஜிஆர் பத்திரிகையை நிர்வகிப்பது இளவரசி மகன் விவேக் ஜெயராமன்தான். ஓபிஎஸ், எடப்பாடி கோஷ்டிகள் இணையும் நிலையில் ஜெயா டிவி, நமது எம்ஜிஆரையும் கைப்பற்றுவது என்பது ஒரு அஜெண்டா.

முட்டுக்கட்டை விவேக்

ஆனால் இதை நிர்வகித்து வரும் விவேக் ஜெயராமன் மிகப் பெரிய முட்டுக்கட்டையாக இருந்து வருவதாக கருதுகிறது ஓபிஎஸ் கோஷ்டி. இதனால் விவேக் ஜெயராமனுடன் ஓபிஎஸ் அணி சாத்வீக முறையில் சமாதானப் பேச்சுகளை நடத்திப் பார்த்தது.

தினகரனுக்கு தளபதி

விவேக் ஜெயராமனோ தாம் ஒரு தொழிலதிபர் மட்டுமே என பட்டும் படாமல் ஒதுங்கிக் கொண்டராம். அதேநேரத்தில் மறைமுகமாக தினகரனுக்கு அனைத்துமாக இருந்து வருவதும் விவேக் ஜெயராமன்தான்.

ஜாஸ் சினிமாஸுக்கு குறி

இதனால் விவேக்கு செக் வைக்கும் வகையில் ஜாஸ் சினிமாஸ் நிறுவனத்தை குறிவைக்கிறது இப்போது ஓபிஎஸ் அணி. அனேகமாக தினகரனுக்கு முட்டுக் கொடுக்கும் அமைச்சர்கள் வீடுகளுக்கு முன்பாக ஜாஸ் சினிமாஸுக்கு வருமான வரித்துறை பட்டாளம் நுழைவதற்கான சாத்தியங்களே அதிகமாம்.

போட்டுக் கொடுக்கும் திவாகரன் தரப்பு

ஏற்கனவே திவாகரன் தரப்பை அதிமுகவுக்குள் நுழையவிடாமல் தினகரனின் தளபதியாக நின்று வருகிறார் விவேக் ஜெயராமன். இதனால் கடுப்பில் உள்ள திவாகரன் தரப்பும் விவேக்குக்கு எதிரான ஏகப்பட்ட ஆதாரங்களை வருமான வரித்துறைக்கு அள்ளி அனுப்பி வருகிறதாம். ஆக அடுத்த வேட்டை விவேக்கின் ஜாஸ் சினிமாஸில்தானாம்!