கருணாநிதி படம் வந்துருச்சு... 'அம்மா' போட்டோ எப்போ ரிலீஸ்?

ஜெயலலிதா நலமுடன் இருக்கும் படங்கள் எப்போ வெளியாகும் என்பது சமூகவலைதளவாசிகளின் கேள்வி.

சென்னை: உடல்நலம் பாதிக்கப்பட்டிருந்த திமுக தலைவர் கருணாநிதி நலமடைந்த நிலையில் அவரது புகைப்படம் வெளியாகி உள்ளது. இதேபோல் அப்பல்லோ மருத்துவமனையில் சிகிச்சை பெற்று குணமடைந்து வரும் முதல்வர் ஜெயலலிதாவின் புகைப்படமும் விரைவில் வெளியாகுமா? என்ற எதிர்பார்ப்பு ஏற்பட்டுள்ளது.

சென்னை அப்பல்லோ மருத்துவமனையில் 60 நாட்களாக சிகிச்சை பெற்று வருகிறார் முதல்வர் ஜெயலலிதா. அவசர சிகிச்சை பிரிவில் இருந்து சிறப்பு வார்டுக்கு அவர் மாற்றப்பட்டுவிட்டதாக கூறப்படுகிறது.

ஜெயலலிதா மருத்துவமனையில் அனுமதிக்கப்பட்ட போதே அவர் சிகிச்சை பெறும் புகைப்படத்தையாவது வெளியிட வேண்டும் என கோரிக்கை வைத்திருந்தார் கருணாநிதி. ஆனால் அவரது இந்த கோரிக்கைக்கு எதிர்ப்பும் எழுந்தது.

இதனிடையே கருணாநிதியும் திடீரென ஒவ்வாமையால் பாதிக்கப்பட்டு ஓய்வில் இருந்து வந்தார். அப்போது சமூக வலைதளங்களில் கருணாநிதி தாம் ஓய்வில் இருக்கும் படங்களை வெளியிடுவாரா? என விமர்சனங்கள் முன்வைக்கப்பட்டன.

தற்போது கருணாநிதி நலமடைந்த நிலையில் தம்மை திமுக பொதுச்செயலர் அன்பழகன் சந்தித்த படத்தை ட்விட்டரில் வெளியிட்டுள்ளார். கருணாநிதி எப்படி தாம் உடல்நலமுடன் இருப்பதாக படத்தை வெளியிட்டிருக்கிறாரோ அதேபோல் ஜெயலலிதாவும் தாம் மறுபிறவி எடுத்திருப்பதாக கூறும் நிலையில் புகைப்படத்தை வெளியிடுவாரா? என சமூகவலைதளவாசிகள் கேள்வி எழுப்பியுள்ளனர்.

English summary

After the DMK leader Karunanidhi posted his photo now Netizens raised the question when the TN govt will release the CM Jayalalithaa's photo from hospital.