அனைத்து தொகுதிகளிலும் டெபாசிட் இழக்கிறது டிடிவி தினகரனின் அமமுக?

டிடிவி தினகரின் அமமுக கட்சி, அனைத்து தொகுதிகளிலும் டெபாசிட் இழக்கும் நிலையில் உள்ளது.

தமிழகம், புதுச்சேரியில் லோக்சபா தேர்தலில் டிடிவி தினகரின் அமமுக கட்சி 38 தொகுதிகளில் போட்டியிட்டது. தென் சென்னையில் மட்டும் அக்கட்சியின் ஆதரவுடன் எஸ்டிபிஐ வேட்பாளர் போட்டியிட்டார்.

இந்த நிலையில் இன்று வாக்குகள் எண்ணப்பட்டு முடிவுகள் வெளியிடப்பட்டு வருகின்றன. இதில், திமுக- அதிமுக இடையில்தான் நேரடி போட்டியாக இருக்கிறது. பெரிதும் எதிர்பார்க்கப்பட்ட டிடிவி தினகரனின் அமமுக கட்சி மிக மோசமான வாக்கு எண்ணிக்கையை பெற்றிருக்கிறது.

அதிமுகவிற்கு சிம்ம சொப்பனமாக இருக்கும் என்று எதிர்பார்க்கப்பட்ட அமமுக பல தொகுதிகளில் ஐந்தாவது இடத்திற்கு தள்ளப்பட்டுள்ளது. டிடிவி தினகரின் சொந்த ஊரான மன்னார்குடி உள்ளிட்ட டெல்டா பகுதிகளில் கூட அக்கட்சிக்கு பெரிய அளவில் வாக்கு விழவில்லை என்றே தெரிகிறது.

மேலும், போட்டியிட்ட அனைத்து தொகுதிகளிலும் அமமுக டெபாசிட் பெறுமா என்ற சந்தேகம் ஏற்பட்டுள்ளது. அதாவது, ஒரு தொகுதியில் பதிவாகும் மொத்த ஓட்டுகளின் எண்ணிக்கையில் 6ல் ஒரு பங்கு ஓட்டுக்களை பெற்றிருந்தால்தான் டெபாசிட் தொகையை திரும்ப பெற முடியும்.

இந்த நிலையில், போட்டியிட்ட அனைத்து தொகுதிகளிலும் டெபாசிட் தொகையை திரும்ப பெறும் அளவுக்கு அமமுக வேட்பாளர்களுக்கு ஓட்டுகள் விழவில்லை என்று தற்போதைய நிலவரப்படி தெரிய வருகிறது.

English summary

According to trend, TTV Dinakaran's AMMK may lose deposit in every lok sabha constituency.