விஜய் செய்த பெரிய தவறு? எடப்பாடிக்குக் கிடைத்த ‘டிரம்ப் கார்டு'.. நிலைமை இனிதான் கையை மீறும்!

சென்னை: தமிழக அரசியல் களம் இதுவரை கண்டிராத ஒரு மாபெரும் அரசியல் சதுரங்க வேட்டையை இரண்டு நாட்களுக்கு முன்பு (மே 13, 2026) புனித ஜார்ஜ் கோட்டையில் அரங்கேறிய நம்பிக்கை வாக்கெடுப்பு (Floor Test) வெளிப்படுத்தியுள்ளது. முதலமைச்சர் சி. ஜோசப் விஜய் தலைமையிலான 'தமிழக வெற்றி கழகம்' (தவெக) அரசு தனது முதல் பெரும்பான்மை சோதனையில் 144 வாக்குகளைப் பெற்று தப்பித்துக்கொண்டாலும், இந்த வாக்கெடுப்பின் மூலம் அதிமுக பொதுச்செயலாளர் எடப்பாடி கே. பழனிசாமிக்கு (EPS) தவெக அரசு அறியாமலேயே ஒரு மாபெரும் அரசியல் ஆயுதத்தை (Trump Card) தாராளமாக வாரி வழங்கியுள்ளது.

தவெக அரசு: கூட்டணிக் கயிறும் முறிந்த பெரும்பான்மையும்

நடந்து முடிந்த 2026 சட்டமன்றத் தேர்தலில் 108 இடங்களை மட்டுமே பெற்று, தனிப்பெரும்பான்மைக்கான 118 இடங்களை எட்ட முடியாமல் தவெக திணறியது. தமிழகத்தில் குடியரசுத் தலைவர் ஆட்சி அமைந்துவிடக் கூடாது என்ற ஒற்றை நோக்கத்திற்காக காங்கிரஸ் (5) கூட்டணி ஆதரவு, விடுதலைச் சிறுத்தைகள் கட்சி (2), மார்க்சிஸ்ட் கம்யூனிஸ்ட் (2), இந்திய கம்யூனிஸ்ட் (2) மற்றும் இந்திய யூனியன் முஸ்லீம் லீக் (2) உள்ளிட்ட கூட்டணிக் கட்சிகள் வெளியிலிருந்து ஆதரவு தந்ததால் விஜய் முதலமைச்சராகப் பொறுப்பேற்றார். இருப்பினும், ஆட்சி எப்போது வேண்டுமானாலும் கவிழலாம் என்ற பலவீனமான நிலையிலேயே தவெக களம் கண்டது.

அதிமுகவின் பிளவு: கொறடா உத்தரவை மீறிய 25 எம்.எல்.ஏ-க்கள்

நம்பிக்கை வாக்கெடுப்பின் போது, தவெக அரசை மிகக் கடுமையாக எதிர்த்த எடப்பாடி பழனிசாமி, அதிமுகவின் 47 எம்.எல்.ஏ-க்களும் அரசுக்கு எதிராகவே வாக்களிக்க வேண்டும் என்று அதிகாரப்பூர்வமாக உத்தரவு பிறப்பித்திருந்தார். ஆனால் சட்டமன்றத்திற்குள் காட்சிகள் தலைகீழாக மாறின. எடப்பாடிக்கு எதிராக சி.வி. சண்முகம் மற்றும் எஸ்.பி. வேலுமணி ஆகியோர் தலைமையில் உருவான அதிருப்தி அணி, இபிஎஸ்-ஸின் உத்தரவை பகிரங்கமாக நிராகரித்தது. எடப்பாடி ஆதரவு எம்.எல்.ஏ-க்கள் தவெக அரசுக்கு எதிராக வாக்களிக்க, சி.வி. சண்முகம் - வேலுமணி அணியைச் சேர்ந்த 25 எம்.எல்.ஏ-க்கள் உத்தரவை மீறி தவெக அரசுக்கு ஆதரவாக வாக்களித்தனர்.

சபாநாயகர் ஜே.சி.டி. பிரபாகர் கொடுத்த 'டிரம்ப் கார்டு'

இங்குதான் எடப்பாடி பழனிசாமிக்குச் சாதகமாக சபாநாயகர் ஜே.சி.டி. பிரபாகர் எடுத்த ஒரு முடிவு, அந்த 25 அதிருப்தி எம்.எல்.ஏ-க்களின் அரசியல் வாழ்விற்குப் பெரிய உலை வைத்துள்ளது.

விஜய் அரசுக்கு எதிரான வாக்குவாதங்களின் முடிவில், மு.க. ஸ்டாலின் மற்றும் எதிர்க்கட்சித் தலைவர் உதயநிதி ஸ்டாலின் தலைமையிலான திமுக (59 எம்.எல்.ஏ-க்கள்) அவையிலிருந்து வெளிநடப்பு (Walkout) செய்தது. சட்டமன்ற விதிகளின்படி, பிரதான எதிர்க்கட்சி வெளிநடப்பு செய்தவுடன் சபாநாயகர் மிக எளிதாக 'குரல் வாக்கெடுப்பு' (Voice Vote) மூலம் தவெக அரசு வென்றதாக அறிவித்திருக்கலாம்.

ஒருவேளை சபாநாயகர் குரல் வாக்கெடுப்பு நடத்தியிருந்தால், எந்தெந்த எம்.எல்.ஏ-க்கள் அரசுக்கு ஆதரவாக 'ஆம்' என்றார்கள், யாரெல்லாம் 'இல்லை' என்றார்கள் என்ற தனிப்பட்ட ஆதாரம் அதிகாரப்பூர்வமாகப் பதிவாகியிருக்காது. இது எதிர்காலத்தில் எடப்பாடி பழனிசாமி நீதிமன்றத்திற்குச் சென்று அந்த 25 பேரையும் கட்சித் தாவல் தடைச் சட்டத்தின் கீழ் தகுதி நீக்கம் செய்ய முயலும் போது, அந்த எம்.எல்.ஏ-க்களுக்குப் பெரும் சட்டப் பாதுகாப்பாக இருந்திருக்கும். "நாங்கள் கொறடா உத்தரவை மீறவில்லை" என்று அவர்கள் தப்பித்திருக்க முடியும்.

ஆனால், சபாநாயகர் ஜே.சி.டி. பிரபாகர் நேரடியாக டிவிஷன் முறையில் முறையைப் பயன்படுத்தினார். இந்த நேரடி வாக்கெடுப்பு முறையினால், எடப்பாடியின் கொறடா உத்தரவை மீறி விஜய் அரசுக்கு ஆதரவாகக் வாக்களித்த 25 அதிமுக எம்.எல்.ஏ-க்களின் பெயர்களும், விவரங்களும் அவைக் குறிப்பில் அதிகாரப்பூர்வ சாட்சியமாகப் பதிவாகிவிட்டன.

எடப்பாடியின் அடுத்த ஆட்டம்: தகுதி நீக்கப் பாய்கிறதா சட்டம்?

தற்போது எடப்பாடி பழனிசாமிக்குக் கிடைத்துள்ள இந்தத் தெளிவான ஆதாரம் (Concrete Evidence), அதிருப்தி எம்.எல்.ஏ-க்களை அரசியலமைப்பின் 10-வது அட்டவணையின்படி (Anti-Defection Law) தகுதி நீக்கம் செய்யப் போதுமானதாகும். வாக்கெடுப்பு முடிந்த சில மணி நேரங்களிலேயே சி.வி. சண்முகம், எஸ்.பி. வேலுமணி உள்ளிட்ட 24 முக்கிய நிர்வாகிகளைப் பதவியிலிருந்து இபிஎஸ் அதிரடியாக நீக்கினார். மேலும், கொறடா உத்தரவை மீறிய 25-க்கும் மேற்பட்ட எம்.எல்.ஏ-க்களை தகுதி நீக்கம் செய்யக் கோரி சபாநாயகரிடம் அதிமுக தரப்பு முறைப்படி மனு அளித்துள்ளது.

சபாநாயகர் நடவடிக்கை எடுக்கத் தவறும்பட்சத்தில், எடப்பாடி பழனிசாமி இந்த வாக்கெடுப்பு ஆதாரத்தை நீதிமன்றத்தில் சமர்ப்பித்து சட்டப் போராட்டம் நடத்த முழு உரிமையும் பெற்றுள்ளார். தவெக அரசு தற்காலிகமாகத் தப்பித்திருக்கலாம், ஆனால் சபாநாயகர் பிரபாகர் நடத்திய நேரடி வாக்கெடுப்பு முறை, இபிஎஸ் கையில் அதிமுகவை மீண்டும் முழுமையாகக் கொண்டு வருவதற்கான ஒரு 'டிரம்ப் கார்டாக' மாறியுள்ளது என்பது மறுக்க முடியாத உண்மை!

English summary

TVK Vijay made a blunder mistake: Edappadi Palanisamy get a trump card against rebels