மாமா எம்.பி.! அம்மா- மகன் எம்எல்ஏ? விருத்தாசலத்தில் முரசு கொட்டுறாரா பிரேமலதா?

விருத்தாசலம்: விருத்தாசலம் தொகுதியில் போட்டியிடும் பிரேமலதா விஜயகாந்துக்கு வெற்றி வாய்ப்பிருக்கிறதா என்பது குறித்து தந்தி டிவி எடுத்த கருத்து கணிப்புகளில் பார்க்கலாம். விருதுநகரில் விஜய பிரபாகரனுக்கு அதிக ஆதரவு இருப்பதாக கணிப்புகள் வெளியான நிலையில் அம்மாவுக்கான வாய்ப்பு எப்படி என்பதை தெரிந்து கொள்ளலாம்.

தந்தி டிவி சார்பில் மார்ச் 29ஆம் தேதி முதல் ஏப்ரல் 17ஆம் தேதி வரை தமிழகத்தில் கருத்துக் கணிப்புகள் நடத்தப்பட்டன. இதன் முடிவுகள் நேற்று வெளியானது.

இதில் திமுக கூட்டணி 98 இடங்களிலும் அதிமுக கூட்டணி 91 இடங்களிலும் வெல்லுமாம். 47 தொகுதிகளில் கடும் போட்டி நிலவும் என்றும் இந்த 47 தொகுதிகளின் வெற்றியை பொறுத்தே யார் ஆட்சி அமைப்பார்கள் என தெரிய வரும்.

தற்போது விஐபி தொகுதி நிலவரம் என்ற அடிப்படையில் விருத்தாசலம் தொகுதியை பார்க்கலாம். விருத்தாசலம் தொகுதியில் தேமுதிக சார்பில் பிரேமலதா விஜயகாந்தும், பாமக சார்பில் தமிழரசி, நாதக சார்பில் ஆனந்தி, தவெக சார்பில் விஜய் ஆகியோர் களமிறங்குகிறார்கள். விருத்தாசலத்தில் தேமுதிகவுக்கு 37 சதவீதம் முதல் 43 சதவீதம் பேர் ஆதரவு தெரிவித்துள்ளார்கள்.

அது போல் பாமகவுக்கு 33 சதவீதம் முதல் 39 சதவீதம் பேர் வரையும் தவெகவுக்கு 14 சதவீதம் முதல் 20 சதவீதம் வரையும், நாதகவுக்கு 2 முதல் 8 சதவீதம் வரையும் வாக்குகள் கிடைக்கலாம் என கணிக்கப்பட்டுள்ளது. விருத்தாசலத்தில் முரசு கொட்ட வாய்ப்பிருப்பதாக தந்தி டிவி கணிப்பில் தெரிவித்துள்ளது.

விஜயகாந்த் முதல் முறையாக வென்ற தொகுதி இது. இங்கு அவரது மனைவி பிரேமலதாவுக்கு அதிகளவில் வெற்றி வாய்ப்புகள் கிடைக்கும் என்கிறார்கள். எல்லாவற்றிற்கும் மேல் பிரேமலதா பிரபலமான முகமாகவும் தேமுதிகவின் முகமாகவும் அறியப்படுகிறார். எனவே அவருக்கு மக்கள் அதிக அளவில் ஆதரவு தெரிவிக்கிறார்கள் என கணிப்புகள் சொல்கின்றன.

கடந்த கால தேர்தல் முடிவுகள்:

2021 தேர்தல்: மதச்சார்பற்ற முற்போக்கு கூட்டணியின் சார்பில் போட்டியிட்ட காங்கிரஸ் வேட்பாளர் ஆர். ராதாகிருஷ்ணன் வெற்றி பெற்றார். இவர் பாமக வேட்பாளர் கார்த்திகேயனை மிகக் குறைந்த வாக்கு வித்தியாசத்தில் (சுமார் 862 வாக்குகள்) தோற்கடித்தார். இதே தொகுதியில் போட்டியிட்ட தேமுதிக பொதுச்செயலாளர் பிரேமலதா விஜயகாந்த் மூன்றாம் இடத்தைப் பிடித்தார்.

2016 தேர்தல்: அ.தி.மு.க-வின் வி.டி. கலைச்செல்வன் வெற்றி பெற்றார். இவர் தி.மு.க வேட்பாளர் பி. கோவிந்தசாமியை வீழ்த்தினார்.

2011 தேர்தல்: தேமுதிக-வின் வி. முத்துகுமார் வெற்றி பெற்றார். அப்போது அ.தி.மு.க - தேமுதிக கூட்டணி வலுவாக இருந்ததால் இத்தொகுதி தேமுதிக வசம் சென்றது.

2006 தேர்தல்: தேமுதிக நிறுவனர் கே. விஜயகாந்த் வெற்றி பெற்றார். மாநிலம் முழுவதும் தி.மு.க - அ.தி.மு.க அலை வீசியபோதும், தனித்து நின்ற விஜயகாந்த் வெற்றி பெற்ற ஒரே தொகுதி இதுதான்.

2001 தேர்தல்: பா.ம.க-வின் ஆர். கோவிந்தசாமி வெற்றி பெற்றார்.

English summary

Thanthi TV’s opinion poll for the Vridhachalam Assembly constituency sheds light on the winning prospects of Premalatha Vijayakanth, who is contesting in the 2026 Tamil Nadu elections. While surveys suggest strong support for her son Vijay Prabhakar in Virudhunagar, political attention has now shifted to whether Premalatha can also secure victory in her constituency.